à vostre satisfaction & l’honneur que nous receuons
auiourd’huy de V. A. R. nous rend tout à fait glorieux,
en suitte toute la trouppe qui estoit la venuë
pour voir ses guerriers se mit à les caresser & les salüer
par mille compliments, ausquels Monsieur le
Prince ne manquoit pas de repartir en peu de mots,
aussi bien que Monsieur de Beaufort qui à son ordinaire
n’obmettoit rien de cette ciuilité qui luy est
comme naturelle.

Enfin s’estant rejoints à S. A. R. ils commencerent
vn discours auec plus de familiarité, laissant à
part le serieux ; Cousin dit-elle à Monsieur le Prince,
ne ririez vous pas de la lettre de Monsieur de l’Hospital,
qui borne vostre victoire au nombre de quatre
cent hommes, cela est bien aysé à dire repartit
Monsieur le Prince, à vn homme qui n’en à rien
veu, il peut bien n’en croire rien du tout, sans pour
cela qu’il y en ait moins, m’a foy dit Monsieur de
Beaufort, cela est bien aysé à dire : mais que cela ne
se fait pas si facilement, vn de la suitte dit tout haut
que c’estoit vn Mazarin & que tous ceux de ce party
ne font autre chose qu’abuser le peuple.

S. A. R. ayant pris Monsieur de Chauigny par le
bras, tenez dit-il à Monsieur le Prince, mon Cousin,
ie vous donne cet homme pour vn franc Mazarin,
ie le connois assez, repartit Monsieur le Prince,
& ie luy suis bien seruiteur.

Mais mon Cousin, interrompit S. A. R. que diriez
vous de la reponse plaisante qu’a fait le Premier President