Avssi tost que le Courrier est venu aduertir
S. A. R. de la venuë de Monsieur
le Prince, elle a tesmoigné tant de joye
de ce retour, qu’elle s’est resoluë déslors de luy
aller au deuant auec toute sa suitte, il n’eût pas
plûtost disné, qu’il monta à cheual accompagné
de quantité de Seigneurs & Gentils-hommes,
qui témoignoient tous également sur leurs
visages la réjoüissance de cette heureuse arriuée,
vne prodigieuse quantité de carosses y estoient
accourus pour auoir part à cette Entreueuë, &
toute la pleine au dessous de Villeiuif estoit couuerte
de monde, qui attendoit auec impatience
que Monsieur le Prince vint à paroistre, qu’on
disoit n’estre pas beaucoup loing.

S. A. Royale s’estant auancée iusqu’au pied
de la Montagne, enuoya quelques-vns des siens
pour aller reconnoistre la Marche de ce Prince,
& pour la venir auertir aussi-tost qu’ils l’auroient
découuert.

Ils ne furent pas long-temps perdus de veuë,
qu’on les vit reuenir à toute bride, faisant connoistre
par ce prompt retour qu’il estoit desia
fort proche ; Aussi l’on vit presque en mesme
tems paroistre vn gros de Caualerie, qui fit juger