peut estre sans force, prudence, & temperance, desquelles
iustice est perpetuellement & inseparablement
accompagnée. Ainsi iustice est vne vertu generale, &
qui comprent en soy toutes les autres vertus.

Mais comme les Roys & Magistrats, sont nais & mis
au monde, pour gouuerner les peuples & leur iustice,
auec preeminence & authorité, c’est à la verité en ces
personnes-là, que la iustice paroist le plus, ou doit paroistre :
C’est par eux que la iustice doit estre cogneuë :
C’est par eux & par leur ministere qu’elle doit reluire,
& nous faire voir ses effets admirables : C’est aussi par
elle, & en l’exercent sincerement, que telles personnes
sont vrays Ministres & Lieutenans de Dieu, qui est le
Pere & Autheur de Iustice. Et enquoy ils luy resemblent
d’auantage, & dont ils reçoiuent vne gloire stable
& vraye, qui leur vaut, non seulement en ce monde,
pour acquerir honneur, mais aussi conduit leur
ame à la vie eternelle, laquelle Dieu leur donne pour
recompense & digne retribution. Et laquelle il leur
doit par sa Iustice, en l’accomplissement desdictes promesses.

C’est elle qui faict les Roys, & sans elle ceux qui se
disent tels, & le pensent estre, ne le sont pas veritablement,
ains des Tyrans, nez à la ruine des pays esquels
ils commandent, & qui sont suiets à mille trauerses, &
l’Empire desquels ne tient qu’à vn filet : ne se maintenans
en leurs Estats que par ruses, artifices, dissimulations
& hypocrisies, qui ont autant de durée qu’elles
demeurent à estre descouuertes. Et quand cela aduient,
il ne se maintient plus que par menaces & cruautez.