Royaume bien attenué, tant des grands, que des
moyens & que des petits, pource qu’ils auoient
porté & souffert vingt ans au plus de grandes &
horribles Tailles qui ne furent iamais si grandes,
à trois millions de France prés, j’entends à leuer
tous les ans : car iamais le Roy Charles VII. ne leua
plus de dix-huict cens mille francs par an, &
le Roy Louis XI. son fils en leuoit à l’heure de son
trépas quarante & sept cens mille francs, sans l’Artillerie
& autres choses semblables, & seulement
c’estoit compassion de voir ou sçauoir la pauureté
du peuple.

Or en ce Royaume tant foible & tant oppressé
en mainte sorte, apres la mort de nostre Roy
Louys XI. y eust-il diuision du peuple, contre celui
qui regne (Charles VIII.) les Princes & les
sujets se mirent-ils en armes contre leur ieune
Roy ? & en voulurent-ils faire vn autre ? luy voulurent
ils oster son authorité ? & le voulurent ils
faire ? si y en a t’il eu d’assez glorieux pour dire
qu’oüy : Toutesfois ils firent l’opposite de tout
ce que ie demande, car tous vindrent vers luy
tant les Princes & les Seigneurs que ceux des bonnes
Villes, tous le recognurent pour leur Roy, &
lui firent serment & hommage, & firent les Princes
& Seigneurs leur foy humblement les genoux
à terre, & baillant par requeste ce qu’ils demandoient,
& dresserent Conseil, où ils firent
compagnons de douze qui y furent nommez, &