leu les Histoires, il eut appris que les diuisions,
seditions, reuoltes & rebellions des peuples, n’eust
iamais eu autre sujet que la trop grande & onereuse
surcharge sur eux par les imposts iniustes &
intollerables qui les ont contraints par fois de
r’allentir en eux cette forte & puissante affection
qu’ils ont pour leurs Princes. Mais Mazarin passant
par dessus ces considerations, ou comme
ignorant en l’Histoire, ou porté d’vn desir impatiable
de ruiner la France, n’a iamais rejeté aucun
aduis d’impost tel qu’il fut pour escorcher le peuple,
cela estoit plus excusable aux Partisans qui les
proposent pour en profiter sans autre consideration
d’honneur, de iustice ny de compassion.
Mais vn qui fait le Ministre d’Estat, & dont la
charge oblige de conseruer l’interest du roy de
l’Estat & du public, & aller au deuant des seditions
& des reuoltes, s’accommoder auec ces larrons
publics, manger le cochon auec eux, &
auoir sa part en leurs griuelées & larcins, est chose
honteuse, & qui n’appartient qu’à vn homme
sans foy, sans religion, sans pieté & sans raison.

S’il eut leu Philippes de Comines, il eut appris
la science de bien gouuerner vn Estat & de bien
conseiller le Prince, & ne le porter à surcharger
son peuple qu’en des vrgentes necessitez, & encore
de l’aduis & consentement des trois Estats. Ie
veux icy rapporter ce que ce fidelle Historien &
grand homme d’Estat escrit.