perir, l’innocent auec le coupable, & destruire à l’appetit
d’vn Estranger ce florissant Empire, Il vous denonce
par moy, qu’il prendra en main la cause de l’innocent
& de l’affligé Que ses armées sont toutes prestes,
qu’elles sont inuincibles & payées iusques à ce qu’il ait
abaissé & foulé à ses pieds tous ceux qui s’esleueront
contre luy.

Et si l’Ange qui eust le commandement, de celuy qui
Regne aux Cieux & en la terre, de faire la guerre au second
Roy d’Israël, qui luy auoit despleu, qui luy tua soixante
& dix mil hommes en peu d’heures. Et au Roy des
Assyriens, Sennacherib du temps d’Ezechias, qui luy
demandoit la paix, & s’assuiettissoit & son peuple à luy,
& rendoit son vassal & tributaire ; Ce Roy cruel &
orgueilleux luy refuse la paix, & iure de le perdre &
tout ce qui luy appartenoit. Le Tout puissant & le Seigneur
de paix, enuoya la nuict suiuante en son Camp
son Ange destructeur, qui luy tua en moins d’vn tournemain
cent quatre-vingts cinq mil de ses meilleurs
soldats, iour venu la terre fut veuë couuerte de corps
morts, dont ce Tyran tout effrayé s’ensuit, & laissa
malgré luy, en paix ceux à qui il l’auoit refusée : Il s’enfuit
& se retire en son païs, où la iustice du Dieu fort le
poursuit & l’attrape en sa Ville Capitale, & dans l’Oratoire
de son Dieu Neroch, où deux de ses fils Adramelech
& Sarasar le tuerent à coups d’espées, & ne
trouua point de misericorde ny de paix auc les siens,
pource qu’il l’auoit refusée à ceux qui la luy auoient
demandée.

Si Cirus le grand Roy des Perses, Medes, Assiriens,
Siriens & Monarque de plusieurs autres grands peuples
& nations, eust accorde la paix à Tomiris Reine des
Messejettes qui la demandoit pour le Roy son fils, en
maillot, il ne fust pas tombé en vie entre les mains de
cette Reine, qui, apres auoir taillé en pieces son armée,
tant de fois victorieuse de plusieurs plus puissans Royaumes