Le Marinier descharge son vaisseau de la marchandise
qui luy pese le plus, lors que la mer
est courroucée. Si vostre Maiesté desire sauuer
son Estat de l’orage qui le menace, il est necessaire
qu’elle bannisse d’elle ces boute-feux, qui
comme Viperes feront perir ceux dont ils tirent
les biens de la vie. SIRE, vous estes comme
malade, qui au fort de son accez ne peut resentir
sa douleur, vous reconnoistrez vn iour le
dommage que vous ont apporté ces Scorpions,
dont la seule ruine y peut remedier.

L’Empereur Marcian disoit que les armes
n’estoient point necessaires à vn Prince quand
il luy estoit loisible d’auoir la paix Ceux que
vous croyez s’estre esleuez contre le seruice deu
à vostre Maiesté n’enuient point la iuste & tranquille
possession de vostre Royaume, ils n’ont
les armes à la main que pour obeyr, & non pour
vous commander ; ce sont ames noircies d’vne
infinité de vices, qui vous remonstrent le contraire,
& qui coulpables de milles meschancetez
vous destournent d’apporter vn reglement
à leur detestable vie, & empeschent vostre
Maiesté d’octroyer à vos suiects ce à quoy
vous estes obligé par les loix diuines & humaines,
& dont vostre mere vous supplie.