A sortir France promptement
S’il desire son sauuement :
Car toutes les Prouinces en armes
Sur luy s’en vont battre l’alarme.
C’est ce qui le fait souspirer,
Se plaindre & se lamenter.
Ha dit-il, pauure miserable !
Pauure Mazarin, pauure Diable,
Faut-il pour ton ambition
Et ta malheureuse action
Sortir de France malheureux,
Au lieu d’y estre glorieux :
Mais laissons Mazarin se plaindre,
Disons icy sans nous contraindre
Que nous ne chomons plus de pain :
Car soit au soir, soit au matin,
Ou au milieu de la iournée
On en a pour de la monnoye,
A prix honneste & raisonnable,
Ie trouue cela honorable
Maintenant on ne se bat plus,
Et d’armes on ne porte plus
Pour faire venir les Boulangers :
Car à present vistes & legers
Ils se monstrent d’asseurance
Car du bled ils ont sans doutance
Plus qu’il n’en vendront d’vn mois,
De deux, & peut-estre de trois :
Car plusieurs Bourgeois Citadins
Ont fait amas de plusieurs grains :
Mais à propos, parmy la ville
On dit que le grand Longueuille
A pris la ville de Herfleur
Qui n’est guerre loins de Honfleur.

Page précédent(e)

Page suivant(e)