en cet estat ne reçoiuent point de visites, prenant
congé d’elle & luy baisant la main en tira le gand
qu’il montra par apres à plusieurs Courtisans de la
Cour par vne vanité extraordinaire, neantmoins
n’en ditte mot, pais,

L’on trouua dans les memoires du feu Cardinal
de Richelieu que lors que le Comte Oliuares Ambassadeur
en France pour le Roy Catholique fut
arriué à Paris, la Reyne desirant fauoriser le party
d’Espagne, & traicter auec auantage des affaires
d’vn Royaume quelle voudroit obliger au preiudice
de la France, qu’elle luy donnoit des rendez-vous
au Conuent du Val de grace, lieu d’autant
moins suspect, qu’il est estimé sainct, que là non
seulement ils s’entretenoient de l’Estat, mais aussi
de leurs amourettes, que bien souuent ils en sortoient
à heures indeuës sans bruit, sans carrosse,
sans suitte, & sans flambeau. Que le Roy par apres
venant à le sçauoir en fut extremement offencé &
respondit à quelques vns qui luy parloient de l’Innocence
de la Reyne. Vous ne la connoissés pas,
c’est vne méchante femme, depuis ce temps elle
en à aymé beaucoup d’autre. Silence n’en parlons
pas, pais.

Il y a quatre vingt ans entiers que la maison de
Condé ne fait que troubler la France, & ruiner l’Estat ;
le pere de celuy-cy estoit le plus lasche de tous
les Princes, son fils est le plus impie ; il est insolent
en ses desseins, imperieux en son gouuernement,
dissolu en ses desbauches, enragé en ses vengeances,
abominable en ses blasphemes, endiablé en ses cõseils,
mais il est Prince, laissons l’horreur de ses actions