plus impie, & le plus meschant, vn esprit ambicieux,
remuant, vindicatif, débordé en ses débauches, enragé
en ses desseins, iniurieux en ses blasphemes, sans
foy, sans Dieu, sans Religion. Il n’en faut rien dire,
Pais.

Les Princes ne sont pas seulement débauchez, ils
sont entierement dissolus, les peuples n’ont point de
plus grands Tyrans, ny les Roys, de plus puissans ennemis,
ils ressemblent à ceste Diuinité, dont parle Pausanias,
qui demandoit tousiours des offrandes : ils crient
sans cesse apres de l’argent, le Souuerain en est souuent
incommodé, & les Suiets ruynez : s’ils ne sont contens,
ils forment des partys, empietent sur l’authorité du
Roy heurtent son Sceptre & sa Couronne, n’ont plus
pour luy ny respect, ny consideration, ny bien veillance :
d’ailleurs ils sont pour l’ordinaire sans conduitte,
sans iugement, sans courage, sans vertu. N’en disons
mot, Pais.

Personne n’ignore que durant la Guerre de paris,
le Prince de Condé auoit intelligence auec celuy de
Conty, qu’ils se donnoient tous deux beau ieu en vne
affaire, où il n’y auoit que les pauures Bourgeois interessez,
où chascun de ces Princes se formoient des pretentions
qui choquoient la minorité du Roy, & le repos
des Prouinces aussi bien que celuy des peuples : que
leur querelle en apparence n’estoit qu’vn dessein proietté,
& que les autres qui estoient ioints auec eux de la
mesme partie, auoient aussi de grandes pretentions
au détruiment du Royaume, & des François. Neantmoins
il n’en faut rien dire, Pais.