procure à son Peuple, c’est de prẽdre les aisles de l’Aigle pour
retourner dans Paris, & ramener le Roy. Toutes les raisons
diuines & humaines non seulement vous conuient, mais vous
forcent d’vne douce violence à prendre cette resolution.

Premierement, MADAME, il n’y a point d’apparence
de faire entrer la Paix comme vne inconnuë dans Paris, Elle
qui est la Fille du Ciel, le nœud de la tres Auguste Trinité,
qui fait le monde par ses accords, & le Paradis par ses regards.
Vostre Maiesté qui est si pieuse, sçait comme on a
traitté de tout temps les Reliques en l’Eglise, & comme on
les a fait entrer dans les Villes portées en triomphe sur les
espaules des Pontifes sacrez, & suiuies des Roys & des Reynes,
auec toutes les Pompes, & toutes les magnificences possibles.
La Paix, MADAME, c’est la Relique de IESVS-CHRIST,
qu’il nous a laissée, & consignée auec son Sang
au dernier de ses iours ; C’est le Fruict de sa Passion, la Conqueste
de son Amour, & l’Ornement de sa Gloire ; & vous la
voudriez faire entrer dans les portes de vostre ville capitale
comme vne captiue, qui auroit honte de se monstrer, & de se
produire au iour qu’elle penseroit n’estre fait que pour esclairer
sa honte. Elle est de trop bon lieu pour supporter ce mespris,
elle a trop de merite pour tirer si peu de respect : Vous ne
pouuez pas ignorer que cét adorable Sacrement à qui vostre
Pieté a iuré vn commerce inseparable s’appelle LA PAIX,
selon l’vsage des anciens Peres de l’Eglise, & vous sçauez en
quel appareil on le porte par nos ruës à cette haute solemnité,
qui fait que toutes les Villes de la Chrestienté semblent
autant d’isles celestes où le Paradis est descendu pour ce iour
là : La Paix est la sœur de l’Eucharistie, qui porte son nom
& ses effects, sans qui elle ne seroit nullement ce qu’elle est ;
Et vostre Maiesté la voudroit faire marcher comme vne Roturiere,
à petit bruit, & à petit train, ce qui feroit croire, ou
que vous ne la iugeriez pas faite, ou que vous auriez quelque
repentance de l’auoir accordée.

Tertullianus
de
pudicitia.

La ville de Paris vous ose dire franchement ce que la Sunamite
dit au Prophete Elizée, qui se contentoit de luy enuoyer
son baston par son Seruiteur Giezi, pour ressusciter son