M. de Chasteau-neuf qui ne desire rien moins
que ce retour, n’a pas manqué d’attaquer fortement
toutes ces raisons, mais l’opiniastreté des
Mazarins pour les faire valoir, en a empesché le
triomphe. Tellement que ne voyant plus de
iour à les pouuoir combatre, il s’est auisé de les
renforcer en apparence pour les affoiblir en effet
auec plus de succez. Il a donc consenti malgré
ses veritables sentimens, au dessein de haster
le retour du Mazarin, non pas comme on dit,
parce que le Mazarin s’est engagé par serment
de renoncer pour iamais en sa faueur à la charge
de premier Ministre d’Estat, car on sçait qu’il a
pour premiere maxime, de n’estre point esclaue
de ses paroles : Mais parce qu’il a iugé que la presence
de ce proscrit fauoriseroit le dessein qu’il a
de le faire perir, en procurant l’vnion de ceux
qui le perdront infailliblement, à moins qu’ils
ne le regardent auec indifference.

Pour faire reüssir cette politique, il a fait le
passioné pour les interests de la Reyne, en luy
faisant entendre qu’estant du moins moralement
impossible d’arracher le Cardinal Mazarin
d’entre les mains de tant d’ennemis qui sembloient
estre sur le point de se liguer, il estoit à
propos de leur lier les bras par les auances de
quelque composition auantageuse.