les Predicateurs des veritez les plus Catholiques,
emprisonné les vns, exilé les autres, & supprimé la plus
grande partie par des moyens effroyables, que le Ciel
n’auoit encor veu, & que l’Enfer, a commencé de cognoistre.
I’ay abandonne tous mes esprits à la malice, des-lors,
que i’ay empesché ses oracles à crier contre le vice, & à
establir les meilleurs mœurs pour le culte de Dieu ; aussi
des-lors, l’aduersité a trauersé le cours de mes desseins, &
l’infortune va descharger tous les coups de la colere sur
ma teste pour sa ruine.

Les tesmoignages de la bonté, de l’affection, & de la
franchise des François, reprochent mes malices, mes
cruautez, & mes fourbes à ma conscience.

Il me souuient que la France a releué ma maison à ses
despens, qu’elle ma reuestu de la pourpre en se couurant
d’haillons, & les foudres de Ratican eussent greslé sur ma
teste, si elle n’eust esté à couuert & a l’ombre de ses lys.

Mais à quel propos, Madame, racontay-je toutes ces choses
à la confusion de mon honneur ? Pourquoy me souuiens-je
de tous ces bien-faicts que i’ay si indignement reconnus ?
la France n’est malheureuse que pour auoir nourry
vn louueteau qui la deuore, & esleué vn vipere qui la
deschire.

Que seruent aux François tant d’eloges données à ma
prudence, & qui donnent de l’enuie & de l’admiration à
toute l’Europe ? que leur a seruy la tolerance auec laquelle
ils ont supporté les excez de mon ambition & de ma cruauté
l’espace de tant d’années ? dequoy leur sert tant de complaisance
pour contenter la superbe de ma vanité ? quel aduantage
ont acquis mes amis de tous les perils qu’ils ont
encourus pour me conseruer dans mon ministere ? & quel
prix receuront de leurs playes toutes ces troupes qui ont
si souuent combattu pour la deffense de ma vie ? vne desolation