accoustumé de faire en des occasions de cette
importance ; Cette question de la Majorité des
Roys, fût mise sur le tapis, pour contrecarer
l’authorité que Messieurs de Guise auoient
vsurpée pendant le bas âge du Roy, sur le
gouuernement des affaires de France : Mais la
decision en fut empeschée par ceux qui auoient
interest en la cause. Tout le monde commença
à murmurer contre leur gouuernement, &
plusieurs personnes se donnerent la liberté d’écrire
contre eux, & plusieurs placards & plusieurs
libelles.

On les accusoit de s’estre voulu approprier
du temps du Roy Henry II. le Duché d’Anjou,
& le Comté de Prouence, ayant dit hautement
plusieurs fois, que l’vne & l’autre leur appartenoit,
& quelles leur auoient esté vsurpées
par les Roys de France. On soustenoit qu’ils
auoient mesmes employé plusieurs Chronologistes,
à la recherche de leur Genealogie, se
disans estre descendus en droite ligne de Charlemagne,
sur la posterité duquel Hugues Capet
s’estoit emparé de la Couronne, attendent
que quelque occasion se presentast, pour la retirer
des mains de ceux qui l’occupoient, au
lieu & place des veritables & legitimes successeurs
de la seconde race.