LA VERITÉ RECONNVE PAR
Monseigneur le Prince de Conde, sur les
entreprise de la Reyne, Contre la Ville
de Paris.

MESSIEVRS, qui voyez & entendez
tous les iours le recit de milles &
milles sacrileges, jettez les yeux de
vostre compassion sur cét execrable monstre
de nature, qui merite à iuste raison d’estre
comparé à cette engeance de vipere, qui venant
au monde ronge pour sortir les entrailles
de la mere qui luy a donné l’entrée de la
vie. Il a parcouru l’Italie & la Cicile lieu de sa
naissance où il a prostitué son corps à des infames
plaisirs pour tascher à faire fortune, & a
rodé toutes les Espagnes desquelles il a esté
chassé auec infamie, il est venu en France où
il a veu tout d’vn coup les fertilitez venir vers
luy auec telle foule qu’il a esté contraint d’auoüer
franchement qu’il n’auoit que faire

-- 4 --

d’aller d’auantage parcourir ny l’Italie, ny la
Cicile, ny les Espagnes pour bastir sa fortune ;
la France est sa mere nourrice, c’est elle qui l’a
receu entre ses bras, & cependant pour comble
de graces il nous rauis nos Louis, & nous
priue de la douce conuersation de nostre
Roy, en ioüissant de sa Mere. Ie croy veritablement
que par ses charmes Diaboliques
il l’a enchantée, elle qui autrefois gemissoit
& pleuroit lors qu’elle voyoit son
peuple oppressé par les tyrannies de milles
& milles Maltotiers & Partisans ; Il n’auoit
pas pris pour lors possession de son ame, il
n’auoit pas charmé son esprit, & ne luy
auoit pas encor parlé touchant les douces
flammes d’amour : Mais ce n’est pas encore
fait, Vous voyez bien maintenant, Messieurs,
que nous sommes le joüet & la risée
des autres Nations, nous souffrons que
le detestable Cardinal nous mette le pied
sur la gorge : Ouy s’en est fait, la France est
perdue pour auoir voulu esleuer vostre
Princesse à vne Souueraine dignité, elle en
meritoit cent fois dauantage : mais tres-Auguste
Parlement vous m’excuserez, s’il
vous plaist, si ie vous dis que vous auez manqué

-- 5 --

en ne tenant point parole à ce
grand Roy Louys XIII. lors qu’il mourut.
Iuste Roy tu auois bien dit, nous le voyons
& l’experimentons à nostre propre dommage,
qu’il ne failloit iamais luy donner la Regence,
que c’estoit vn esprit volage, & vne
girouëtte à tout vent, elle veut se lauer dedans
le sang des François, & veut mettre
tout au feu & au pillage pour satisfaire à sa
brutalité. Mais vn seul à combatu & exposé
la vie cent & cent fois pour rendre la liberté
à la Patrie, & pour reprimer l’audace & la colere
de cette autruche, qui digerant le fer &
l’acier, prendra plus de plaisir à voir le sang
des François. Condé, nom agreable à tous
les François, ouy c’est ce grand Prince de Conde
ce courage inuincible, qui triomphe
[illisible] de ses ennemis. Mazarin s’est
attiré sur soy la haine de tout le monde à cause
de sa lubricité : Et luy par son courage l’aplaudissement
de tous ; Si les traitres n’eussent
point trahys & arresté le cours de ses victoires,
il pourroit maintenant rendre la pareille
a ce detestable Cardinal, qui l’auoit detenu
l’espace d’vn si long-temps dedans le haute
de grace : mais cruauté estrange, il luy
vouloir ester la conuersation des liures &
faire comme cét horrible monstre de nature,

-- 6 --

qui se disoit grand amy de Dieu Mahomet,
qui defendit au Turcs la lecture d’aucun lure
(excepté l’Alcoran) crainte qu’ils ne s’apperceussent
de ses fourbes.

 

Mazarin veut l’imiter en toutes ses actions,
il dit que la lubricité est icite, puis qu’elle est
permis chez les Turcs, il chatoüille l’oreille
de la Reyne, il fait comme ses [illisible], il
l’endore pour enfin la faire tomber dans vn
principice. Mais grande Reine la plus vertueuse
qui ait iamais paru dans la France, ouurez
maintenant le, yeux, ostez ce bandeau
qui vous empesche de connoistre la verité &
le peril où vous estes ; Implorez l’assistance
d’en haut elle seul vous peut la monstrer, &
vous le faire connoistre : Mais que me sert-il,
Messieurs, de perdre icy mon temps à luy
vouloir persuader ; en l’estat quelle est elle
n’entend rien, elle est trop endormie. Mais
Grand Dieu, où ont vos foudres, que ne les
lancez vous sur la teste de cette horrible Magisien
qui l’a si fort enchanté, qu’elle l’ayme &
ne le peut quitter, quoy qu’il s’agisse de la perte
de la France : Elle ressemble à cet Semitaramis,
elle fait demembrer & écorcher tous
le iours la France, la peau de laquelle elle se
couure pour plaire d’auantage a ce brutal de
Mazarin : Elle aime comme Semiramis vn

-- 7 --

cheual & vn brutal. Quoy nos Lys seront ils
ainsi profanez retire toy d’icy miserable, ne
vient plus mesler les abominables regles des
Turcs auec nostre Christianisme, va chercher
ailleurs vne autre proye, & ne vient plus ternir
la renommée de ces genereux François par
tes insolences perpetuelles. Tu te dis Cardinal
du S. Siege Apostolique, en fais tu aucune
fonction, non car dis moy, a quoy passe
tu les iours, à perdre l’vn, à oster la vie à l autre,
est ce là la fonction d’vn Cardinal ; Non, non
songe à toy, abaisse toy & t’humilie deuant
Dieu & deuant les hommes, autant que tu
tes esleué, Regarde la main de ce grand
Dieu pres à lancer ses foudres sur ta malheureuse
teste, fais penitence afin que Dieu te
pardonne toutes tes pilleries & voleries, &
qu’il ne te donne point la mort etenelle, que
tu as a iuste raison meritée.

 

FIN.

-- 8 --