REMONSTRANCES DV PARLEMENT
de Bordeaux faites au Roy pour
la Iustification de Monsieur le Prince.

NOSTRE SOVVERAIN
SEIGNEVR,
Tant & si tres-humblement
que faire pouuons à vostre bon
grace nous recommandons.

Nostre souuerain Seigneur, nous auons
reçeu de Vostre Majesté les effects de sa Iustice

-- 5 --

& de sa bonté dans l’exclusion du Cardinal Mazarin
& de ses adhærans, & nous esperions que son
esprit ne troubleroit plus l’vnion de la Maison
Royalle tres necessaire au repos de l’Estat C’est
auec douleur que nous voyons de nouueaux suiets
d’en craindre la d’esunion, puisque la reputation
de Monsieur le Prince, attaquée par des accusations
qui choquent vostre Maiesté dans la
personne d’vn Prince de vostre sang, nous doit
faire craindre que si vostre authorité violée dans
cette rencontre n’esloigne, & n’en faict punir les
autheurs, la France trouuera dans le peu de sureté
que pourra prendre Monsieur le Prince, des malheurs
ineuitables ; & la Guyenne, de laquelle vostre
Maiesté luy a confié le Gouuernement des
suiets de douleur ou elle auoit creu rencontrer
son repos & tranquilité. Si vostre Maieste faict reflection,
que la naissance de Monsieur le Prince,
ses seruices & sa conduitte le mettent à couuert
des impostures que ses ennemis, & ceux de l’Estat
luy suscitent, elle donnera vn exemple à la posterité,
qui fera voir que les Roys ne peuuent iamais
soubçonner leur sang d’intelligence auec leurs
ennemis sans s’esmouuoir, & faisant agir sa iustice
contre les Autheurs d’vn si pernicieux aduis, elle
estouffera leur dessein, dont l’obiect est de rompre
l’intelligence de la Maison Royalle & de destruire
cette vnion, qui seule maintient vos Estats
dans vne parfaicte correspondance au bien du

-- 6 --

seruice de vostre Maiesté, & au soustient de son
authorité ; ces raisons nous ont obligé de remonstrer
tres humblement à vostre Maiesté l’imporstance
de l’escrit informe que nous auons receu,
& la consequence d’vne accusation de cette nature.
Nous esperõs que par la cognoissance qu’aura
vostre Maiesté d’vne supposition manifeste,
elle receura la iustification d’vn Prince duquel les
actions contre les ennemis de vostre stat sont
autant de preuues de son innocence, & dont les
asseurances qu’il donne à vos Parlements & au
Publicq, & les tesmoignages que rend M. le Duc
d’Orleans par sa Declaration ostent les doubtes
& les deffiances qu’on veut faire prendre de ses intentions.
Nous attendons aussi de la iustice de vostre
Maiesté esclairée par cette justification, que
faisant punir les Autheurs qui ont troublé le repos
de la Maison Royalle, elle donnera le calme à ses
Peuples, & causera de l’étonnement à ses ennemis,
qui tirent leur profit de nos desordres, & craignent
cette vnion tant desirée, pour laquelle nous
faisons des vœux continuels au Ciel, & qu’il luy
plaise

 

NOSTRE SOVVERAIN SEIGNEVR,
Combler Vostre Royalle & Sacrée Maiesté de ses graces & benedictions,

Vos tres humbles, tres-obeissans, & tres-fidelles
Seruiteurs, Officiers & Sujets,
les Gens tenants la Cour de Parlement
de Bourdeaux.

Escript à Bourdeaux en Parlement, les Chambres assemblées,
le xxx. d’Aoust, 1651.

-- 7 --