Suau [signé] [1651 [?]], ARREST. DE LA COVR DE Parlement de Bordeaux, contre le Cardinal Mazarin, portant qu’il vuidera le Royaume dans huictaine. , françaisRéférence RIM : M0_188. Cote locale : B_11_5b.
Section précédent(e)

ead>ARREST.

DE LA COVR DE
Parlement de Bordeaux,
contre le Cardinal Mazarin,
portant qu’il vuidera le
Royaume dans huictaine.

EXTRAICT DES REGISTRES DE
la Cour de Parlement.

CE jour la Cour les Chambres assemblées,
deliberant sur la Lettre qui
luy a esté écrite par Messieurs du Parlement
de Paris, & sur celle des Deputez
de ladite Cour, qui sont prés de leurs Majestez,
lecture faite des Arrests dudit Parlement,
des 4. 7. & 9. du present mois ; Et oüys sur ce les

-- 2 --

Gens du Roy, AORDONNÉ & ordonne, Que
le Roy & la Reyne Regente seront tres-humblement
remerciez par ses Deputez de l’éloignemens
du Cardinal Mazarin, sans esperance de retour
suiuant la Declaration qui a esté portée audit
Parlement de paris. Et en consequence, enjoint
audit Cardinal Mazarin,à ses parens & Domestiques
estrangers de vuider le Royaume dans
huictaine. Fait inhibitions & deffences à tous les
Gouuerneurs & Capitaines des Places, Maires,
Escheuins, Consuls & Iurats des Villes du Ressort,
de leur donner aucune retraite, ayde, ny faueur ;
Et apres la huictaine passée, leur permer d’assembler
les Communes pour leur courir sus. Ordonne
en outre que par les mesmes Deputez leurs
Majestez seront tres-humblement supliées d’exclure
à l’aduenir des Conseils du Roy tous Estrãgers,
mesmes ceux qui sont naturalisez & tous
autres, ayant serment à autre Prince qu’au Roy,
& d’en faire expedier la Declaration, pour estre
enuoyée à son Parlement, afin qu’elle y soit publiée
& enregistrée comme vne loy inuiolable,
à laquelle il ne soit point contreuenu. Et sera le
present Arrest affiche, leu & publié à son de Trõpe
par les Cantons accoustumez de la presente
ville, & enuoyé aux Bailliages, Senechaussées &

-- 3 --

Sieges du R effort, pour y estre pareillement leu,
publié & executé à la Requeste du Procureur
General du Roy, & diligence de ses Substituts.
Fait à Bordeaux en Parlement les Chambres assemblées
le 15. jour de Fevrier mil six cens cinquante
vn. Signé SVAV.

 

LE seiziéme Fevrier, mil six cens cinquante
& vn, l’Arrest de la Cour cy dessus a esté
par Nous Huissier en ladite Cour, assisté de Maistre
Iean Riuiere mon Collegue, aussi Huissier en ladite
Cour, du Capitaine du Guet & des Archers de ladite
Ville, leu & publié à son de Trompe par les Cantons
& Carrefours accoustumez de cette Ville, aux fins
qu’il soit notoire à vn châcun, & que personne n’en
pretende cause d’ignorance. Fait à Bordeaux le jour,
mois & an que dessus. Signé, MAZERAN.

A PARIS, Chés Guillaume Sassier, Imprimeur & Libraire ordinaire
du Roy, ruë des Cordiers, proche la Sorbonne, aux
deux Tourterelles.

Section précédent(e)


Suau [signé] [1651 [?]], ARREST. DE LA COVR DE Parlement de Bordeaux, contre le Cardinal Mazarin, portant qu’il vuidera le Royaume dans huictaine. , françaisRéférence RIM : M0_188. Cote locale : B_11_5b.