Suau [signé] [1651 [?]], ARREST DV PARLEMENT DE BORDEAVX, Sur la retraite de Monsieur le Prince. , françaisRéférence RIM : Mx. Cote locale : D_1_46.
SubSect précédent(e)

ARREST DV PARLEMENT
de Bordeaux, rendu en consequence des Lettres
qui leur furent escrites par Monseigneur le
Prince, sur le sujet de sa retraite.

LA Cour les Chambres assemblées,
deliberant sur la lettre a elle escrite
par Monseigneur le Prince le 8. du present
mois, par la quelle il donne aduis à la Cour
qu’au preiudice du repos de l’Estat & des
Arrests des Cours Souueraines, Il se fait
encore à present des pratiques par les
sieurs de Seruient, le Tellier, Lyonne &
autres pour faire reuenir en France le Cardinal
Mazarin, & le restablir dans le Ministere,
Et que pour y paruenir plus facilement,
on a voulu entreprendre sur la personne
dudit Seigneur Prince. Apres auoir
ouy les Gens du Roy en consequence des
Arrests de ladite Cour, A fait & fait tres-expresses
inhibitions & defences audit
Cardinal Mazarin, ses parens & domestiques,

-- 3 --

de rentrer dans le Royaume, à peine
d’estre traitez comme criminels de leze
Majesté & perturbateurs du repos public,
& à toutes personnes de quelle qualité &
condition qu’elles soient d’auoir aucune
communication auec luy par lettres, par
personnes interposées, ny en quelle autre
maniere que ce soit, ny faire aucunes brigues
& monopoles pour le restablissemẽt
dudit cardinal Mazarin, à peine d’estre declarez
criminels de leze Majesté. Ordonne
qu’il sera informé dans le ressort de la cour
des pratiques & monopoles qui ont esté
faites ou se pourroient faire pour ledit restablissement,
& où ledit cardinal Mazarin
aucun de ses parens & domestiques se trouueroient
dans le ressort de ladite cour, enjoint
à tous les Gouuerneurs, capitaines &
Officiers, Maires Escheuins & consuls d’assembler
les communes pour leur coutre
sus. Et outre ladite cour ordonne que le
Roy & la Reine Regente seront tres humblement
suppliez d’éloigner des conseils
de leurs Majestez lesdits Sieurs Seruient,
le Tellier, & Lyonne pour y maintenir &

-- 4 --

conseruer l’vnion dans la maison Royalle,
si necessaire au bien de l’Estat, & au repos
& tranquilité publique, & aux fins que
personne n’en pretende cause d’ignorance
sera le present Arrest affiché par les cantõs
& carrefours accoustumez de la presente
Ville, enuoyé dans tous les Sieges & Bailliages
du ressort, & executé en vertu du
simple dictum. Faict à Bordeaux en Parlement
les chambres assemblées, le 13. Iuillet
1651.

 

Signé, SVAV.

SubSect précédent(e)


Suau [signé] [1651 [?]], ARREST DV PARLEMENT DE BORDEAVX, Sur la retraite de Monsieur le Prince. , françaisRéférence RIM : Mx. Cote locale : D_1_46.