EXTRAICT
DES REGISTRES
du Parlement.

SVR ce qui a esté representè
à la Cour, que
le sieur Duc d’Espernon,
a dessein de venir
assieger la presente Ville,
& ruyner tous les enuirons d’icelle,
& qu’il a pour cét effet ferme tous
les passages des riuieres, qu’il rauage
iournellement les maisons de la Cãpagne,
appartenantes aux Habitans

-- 4 --

de la presente Ville, fait emporter
les meubles & grains, qu’il trouue en
icelles, & que pour paruenir à son dessein,
il assemble grand nombre de
gens de guerre, contraint & violante
les Communautez, de luy fournir
des hommes, & a conuoqué toute
la Noblesse de son Gouuernement.
Et oüy le Procureur General du
Roy, la Cour, les Chambres d’icelle
assemblées, a fait inhibitions & deffenses
aux Gentils-hommes du ressort,
& à tous autres, de porter les armes
à la suite du sieur Duc d’Espernon,
dans le dessein qu’il a contre la
ville de Bourdeaux, & les enuirons

-- 5 --

à peine de priuation de Noblesse, razement
de leurs maisons & degradations
des bois, & de responùre en
leur nom propre & priué, de tous les
degats, ruynes, rauages, despens,
dommages & interests, que les particuliers
souffriront : Exhorte ladite
Noblesse, de venir assister de leurs
armes la presente Ville, contre les
oppressions dudit sieur Duc d’Espernon.
Enjoint aux Communautez
du ressort de la Cour, de fournir
hommes & argent, suiuant leur
pouuoir, pour la deffense de la presente
Ville, & sera le present Arrest

-- 6 --

leu & publié, par tout où besoin
sera, & enuoyé par tous les Bailliages
& Seneschaussées & Iurisdictions du
present ressort, pour y estre fait pareille
lecture, & publication, aux fins
que personne n’en pretende cause
d’ignorance. FAIT A BOVRDEAVX
en Parlement, les
Chambres assemblées, le seiziesme
Aoust, mil six cens quarante-neuf.

 

signé. DEPONTAC.

A esté publié à Bordeaux le 19 Aoust 1649.