QVADRINS POVR LE BIEN
PVBLIC.

 

L’EMPIRE des François precipite sa ruine
Si tous les trois Estats l’ancien droit ne reprennent,
De nos libres Gaulois, car ceux qui le gouuernent
Sont vn corps scelerat exempt de loy humaine.

 

 

Sainte Religion, tu soulois presider :
La vaillante Noblesse en son lustre suiuoit :
Du Senat la sagesse enfin on escoutoit,
Le Prince sa Requeste faisoit emologuer.

 

 

Bon Pasteur ta constance chaque brebis admire,
Inuincible Beaufort, qui ce colosse esbranle,
Senateur dont le sort accommencé le branle
Trois Estats de la France releuez cét Empire.

 

 

Mais vne forte idée, mon iugement balance,
Si pour le releuer, il ne faut sous le fais
Comme vn Samson tomber. A si glorieux faits,
La Noblesse zelée à tout peril se lance.

 

 

La boulette, & l’Espée, le bras de la Iustice
Estroittement liez, font vn triple foüet,
Que le sens des damnez apprehende vn roüet
De dure destinée à torture & supplice.

 

 

Mais si tu le deslie (car l’Enfer n’a la force,
Ny le fer, ny le feu de rompre ce lien)
Par menaces deceu, ou benefice humain
De ton cordeau te lie, tu es pris à l’amorce.

 

 

Que le nombre plus grand de tes freres perfides
Ne choque point le sens d’vn genereux courage.
Qui flechit à tout vent, à la fin fait naufrage ;
La fortune tournant vomit des Arstides.

 

 

O vray Dieu qui preside à l’assemblée des Iuges,
Souffre tu que les Dieux bastards & corrompus,
O dieux à tes yeux, où iugent tes esleus :
Là la race reside pour planter leurs mensonges ?

 

-- 16 --

En Octobre 1649