DE PAR LE ROY.

NOS amez & feaux, Desirans faire cesser les presens
mouuemens qui sont en nostre Ville de Bordeaux &
aux enuirons, & restablir le repos & la tranquillité en
ces quartiers, pour nous donner d’autant plus moyen de
paruenir à la paix generale, que nous voulons procurer
à tout nostre Royaume ; Nous auons fait expedier la Declaration
d’amnistie, de toutes les choses qui se sont passées à l’occasion
desdits mouuemens, & arresté les Articles que nous auons estimé à
propos pour l’accommodement entier des affaires : Et enuoyant lesdites
expeditions à nostre Cousin le Mareschal du Plessis Prassin Gouuerneur
de nostre tres-cher & tres-amé Frere vnique le Duc d’Anjou,
pour les faire ponctuellement executer ; Nous vous faisons cette Lettre
de l’Aduis de la Reine Regente nostre tres-honorée Dame & Mere,
pour vous mander & ordonner d’adiouster creance à ce que nostredit
Cousin vous fera entendre, & vous exhorter de contribuer tout ce qui
dependra de vous, pour l’execution de ce qui est porté par nostre dite
Declaration & Articles ; Vous confirmant de plus les asseurances que
nostre Oncle le Duc d’Orleans a données de nostre part à vos Deputez,
& nos bonnes & sinceres intentions en vostre endroit. DONNE
à Paris le vingt-sixiéme Decembre 1649 Signé, LOVIS, & plus bas,
Par le Roy, la Reine Regente sa Mere presente, PHELIPHAVX,
Et au dessus de ladite Lettre est écrit,

A nos amez & feaux les Gens tenans la Cour de Parlement de Bordeaux.