Louis (XIV), De Loménie [signé] [1651], LETTRE DV ROY A MONSEIGNEVR LE DVC DE MONTBAZON PAIR ET GRAND VENEVR DE FRANCE Gouuerneur & Lieutenant general pour le Roy en la Prouince de l’Isle de France. Contenant le succez du voyage du Roy en sa Prouince de Berry, & quelques Particularitez de la conduite de Monsieur le Prince. , françaisRéférence RIM : M0_2136. Cote locale : B_20_37.
Section précédent(e)

DV ROY
A MONSEIGNEVR
LE DVC
DE MONTBAZON
PAIR ET GRAND VENEVR DE FRANCE
Gouuerneur & Lieutenant general pour le Roy
en la Prouince de l’Isle de France.

Contenant le succez du voyage du Roy en sa Prouince
de Berry, & quelques Particularitez
de la conduite de Monsieur le Prince.

A PARIS,
Chez la Vefve de CLAVDE RIBOT, au Marché aux
Poirees, à la Sereine, proche les Saincts Innocens.

M. DC LI.

-- 2 --

-- 3 --

Mon Cousin, Encore
que ie vous aye déia
assez fait connoistre
les sujets de mécontentement
que i’ay de
la conduite de mon
Cousin le Prince de Condé par son
éloignement d’aupres de moy sans
aucun fondement, & son voyage en
Guyenne sans mes ordres & ma permission,
& depuis par les leuées qu’il
fait & fait faire de toutes parts d’hommes
& d’argent, pour former vn party
dans mon Royaume contre moy, &
que ie ne doute pas que vous n’ayez
fait ce qui a esté en vostre pouuoir

-- 4 --

pour empescher toute pratique & entreprise
preiudiciable à mon seruice
& au repos de mes Sujets dans l’étenduë
de vostre Charge : Neantmoins
ayant aduis de diuers endroits que lesdites
leuées cõtinuent ; que l’on prend
les deniers de mes receptes des Tailles,
Taillon, Gabelles, & autres droicts
au nom dudit Prince de Condé ; que
l’on met sur pied vn grand nombre de
gens de guerre sur ses Commissions ;
que le Cõte du Daugnon mon Lieutenant
Generalau Gouuernement de
Broüage, & Lieutenant General en
la Marine, apres auoir receu vne infinité
de graces & de bien faits de moy,
a esté si inconsidéré & si temeraire,
que de se jetter dans ce party, & qu’il
fait des armemens par mer & par terre
contre mon autorité & mon seruice,
abusant de la confiance que i’ay euë
en la fidelité à laquelle sa naissance

-- 5 --

& mes bien-faits l’obligeoit, luy ayant
donné lesdites Charges, & le commandement
dans vne place si importante
que celle de Broüage ; que beaucoup
de gens par foiblesse, plûtost que
par mauuais dessein, se iettent dans
cette faction à faute d’en estre diuertis
ou d’estre appuyez : l’ay bien voulu
vous faire cette Lettre, pour vous dire
que vous ayez à redoubler vos soins
pour empescher qu’aucun de mes Sujets
ne prenne les armes ny aucun engagement
pour ce party ; & que si
quelqu’vn est si osé que de contreuenir
aux defẽses que vous auez deu faire
pour cette fin, suiuant les ordres que ie
vous en ay adressez, vous les fassiez arrester
& punir exemplairement selon
la rigueur des Ordonnances : Que s’il
se faisoit quelque leuée de deniers ou
quelque assemblée de gens sans mes
Commissions & Ordres, vous ayez

-- 6 --

aussi à vous y opposer, & employer
la force de la Noblesse & des communes,
& les Preuosts des Mareschaux,
pour dissiper toutes assemblées, & en
faire punir les coupables : Et i’espere
(Dieu aidant) que par mes soins, & de
ceux qui commandent pour moy dãs
mes Prouinces, chacun connoissant
les pernicieuses entreprises que l’on
fait contre moy & mon seruice, elles
n’auront aucun progrés. Surquoy ie
desire que vous fassiez sçauoir, cõme
dans cette Prouince & dans celles qui
en sont voisines que toute la Noblesse
& le peuple sont dans vne parfaite
obeïssance, & me rendent tous les
iours des preuues de leur fidelité : Que
depuis que ie suis de pardeça, le Prince
de Conty, la Duchesse de Lõgue ville,
le Duc de Nemours, & la Caualerie
qu’ils auoient auec eux dans Mourrond,
s’en sont retirez de nuit, & sont

-- 7 --

allez vers Bordeaux, où ils pretendent
vnir leurs forces : Que cependant ie
fais estat de me porter par tout où besoin
sera pour asseurer le repos de mes
Prouinces ; Et que vers mes frontieres
de Picardie, de Flandres, & d’Artois,
mon Cousin le Sieur d’Aumont Mareschal
de France, s’oppose aux principales
forces des ennemis, en sorte
qu’ils n’y peuuent rien entreprendre
de considerable ; & mon Cousin le
Sieur de la Ferté-Seneterre Mareschal
de France, en celles de Champagne
& de Luxembourg, où il a poussé
iusques dans le Comte de Namur, les
troupes Espagnoles & celles du Prince
de Condé qui estoient iointes, leur
ayant fait passer quatre Riuieres auec
vne extréme épouuante & perte ; si
bien qu’ils sont à present hors d’estat
de nuire de ce costé là. C’est ce que ie
vous diray par cette Lettre, priant

-- 8 --

Dieu qu’il vous ait, mon Cousin, en sa
sainte garde. Escrit à Bourges le 17.
Octobre 1651.

 

LOVIS.

DE LOMENIE.

Section précédent(e)


Louis (XIV), De Loménie [signé] [1651], LETTRE DV ROY A MONSEIGNEVR LE DVC DE MONTBAZON PAIR ET GRAND VENEVR DE FRANCE Gouuerneur & Lieutenant general pour le Roy en la Prouince de l’Isle de France. Contenant le succez du voyage du Roy en sa Prouince de Berry, & quelques Particularitez de la conduite de Monsieur le Prince. , françaisRéférence RIM : M0_2136. Cote locale : B_20_37.