A MADAME LA DVCHESSE
d’Orleans.

LE Marquis de Sabloniere vous portera tout ce que
i’ay creu ne deuoir escrire. Ie ne doute pas que Monsieur
de Beaufort ne vous aye fait entendre ce qu’il a veu,
& comme il estoit luy-mesme dans diuerses pensées, mais
ie ne sçay comme il vous l’aura fait entendre. Ie n’ay fait
que ce que i’ay tousiours dit, de me retirer, lors que vos
gens d’Estampes seroient en seureté. Ils y sont bien, puis
que les Ennemis leur ont donné toute liberté d’auoir conuenu
auec le Vicomte de Turenne de ma retraitte. I’ay
tousiours dit à Monsieur & au Prince, & à tous, que ie ne
ferois autre ajustement que celuy là. De n’auoir pas combatu,
il n’a pas tenu à moy, iamais ie n’ay enuoyé vers les
ennemis, ny pretendu rien d’eux. Ils m’ont enuoyé & renuoyé
six heures durant, sans auoir voulu respondre, ne me
demandant autre chose que ma retraitte, dont ie suis enfin
tombé d’accord à la teste des armées. Toutes choses
m’y ont obligé, quoy que i’aye veu mes trouppes en estat
de se bien battre sans vostre secours. Les Ennemis ont
trouué bon de me donner lieu de l’esuiter, & ie I’ay trouué
bon aussi ; puis que ie n’estois secouru de pain, ny d’hommes,
comme l’on m’auoit promis. Ie suis à vous.