SERMENT
DE L’VNION
DES PRINCES & Seigneurs ligués ensemble
pour le bien public, contre le
mauuais gouuernement de
Iules Mazarin, en Ianuier
1649.

M. DC. XLIX.

-- 2 --

-- 3 --

N’aians eu autre intention, que celle de conserver
l’Etat & l’Authorité Royale dans le lustre
& l’eclat que tous fideles Sujets les doivent
maintenir, & connu, que la mauuaise administration
du Cardinal Mazarin, marquée par vne infinité
d’actions injustes & violentes, en causeroit
indubitablement la ruïne, la dissipation & l’abaissement,
principalement dans l’oppression notoirement
entreprise contre les Cours Souveraines &
la dignité des Loix depuis si long temps etablies
en ce Royaume, Nous avons promis & juré sur les
saintes Evangiles, d’vn commun consentement,
que pour les soutenir, nous employerons librement
& franchement nos biens & nos vies : Et
pour ce sujet, Nous voulons que ceux de nous qui
contreviendroient à la parole qu’ils en ont si solennellement
donnée, soient tenus pour gens sans foy
& sans honneur. Que s’il arrive qu en general ou
en particulier il s’en rencontre aucun capable de
se relâcher, & accepter aucunes offres & conditions,
sans que ledit Cardinal Mazarin n’ait este
chassé du Royaume, comme Perturbateur du repos
public, ainsi qu’il a esté declaré par l’Arrest du
8. Ianvier dernier, 1649. chacun de nous rétably
dans ses biens, charges & honneurs, & tous les subjets
du Roy assurez contre les violences exercées
durant son ministere, la grandeur de l’Estat, & le
seruice de sa Majesté consideré comme il est requis,
& que le deuoir de nostre naissance nous y

-- 4 --

oblige : & dans ce dessein qui doit estre si generalement
approuué, estant appuyé sur de si legitimes
fondements, Nous nous promettons reciproquement
aussi que pour quelque cause, consideration
ou pretexte que ce soit, d’interest ou
d’auantage particulier, lors que les choses viendront
à vn accommodement, de ne nous des-vnir
iamais les vns des autres, & ne point traitter separement,
mais tout ensemble. En foy dequoy,
Nous auons respectiuement signé le present escrit,
duquel nous protestons de ne nous point departir,
& d’obseruer inuiolablement tout ce qu’il
contient. Et qu’en cas que le Cardinal Mazarin
se retire du Royaume pour n’y plus rentrer, ou
qu’il ayt receu le chastiment que meritent ses crimes,
Nous nous engagerons à toute l’obeissance
que doiuent les fidelles Subiets, & à ceux qu’ils
sont obligez en honneur & en conscience d’apporter
du leur pour s’opposer aux ennemis de l’Estat,
afin de pouuoir parvenir à vne Paix glorieuse à la
Majesté Royale, & aduantageuse à la France.
Et pour l’execution des conditions susdites, concernans
nos interests & nos pretentions, Nous
mettons dés à present, de nous en remettre absolument
aux aduis de Messieurs du Parlement.

 

Les signatures sont, Les Princes de Conty, Duc de Longueville,
Duc de Beaufort, Duc d’Elbœuf, Duc de Boüillon,
Duc de Brissac, Mareschal de la Motte, Marquis de Noirmonstier,
& plusieurs autres.