Anonyme [1652], HISTOIRE VERITABLE D’vn accident tragyque arrivé à Pontoise, en la maison du sieur de Bordeaux Intendant des finances. , françaisRéférence RIM : M0_1651. Cote locale : B_15_23.
Section précédent(e)

HISTOIRE
VERITABLE
D’vn accident tragyque arrivé à
Pontoise, en la maison du sieur
de Bordeaux Intendant des
finances.

A PARIS,
Chez Nicolas le Drut, au Mont sainct
Hilaire.

M. DC. LII.

Auec Permission

-- 2 --

-- 3 --

HISTOIRE
VERITABLE D’VN ACCIDENT
tragique arriué à Ponthoise,
en la maison du sieur de Bordeaux,
Intendant des Finances.

LE sieur de Bordeaux, Intendant
des Finances, tient table ouuerte
à Pontoise, & il s’y trouue souuent des
personnes de toutes conditions.

Le deuxiéme iour du present mois
d’Aoust, le sieur Zungododei Secretaire,
confidant du Mazarin, s’y rencontra

-- 4 --

à disner auec le sieur Catelan, Secretaire
du Conseil.

 

L’entretien ordinaire de Pontoise
est, de ce qui se passe à Paris, comme
celuy de Paris est, de ce qui se fait à
Pontoise.

Pendant la meilleure partie du repas,
il y fut parlé de la Garde Bourgeoise
de Paris, de la difficulté des passeports,
de la maniere dont on pouuoit
sortir sans passeport, de la leuée
des tailles, & l’entretien estoit pacifique
iusques au fruict, où le sieur Zungododei
dit, qu’il falloit ruiner Paris,
que c’estoit vne Ville rebelle, qui s’opposoit
à la grandeur du Roy, & à toutes
ses volontez, & que ce seroit vn
grand bien si elle estoit bruslée.

Catelan ayant ouy ce discours, luy
repartit, qu’il ne pouuoit demeurer
d’accord de cette proposition, que tant
que le Roy ne seroit pas Roy de Paris,

-- 5 --

le Roy seroit peu de chose.

 

Zungododei regarde Catelan, &
luy demande quel interest il y prenoit.

Catelan respond, que son interest
est pour la conseruation de sa famille, &
de ses enfans, de ses parens, & de son
bien.

Zungododei demande où il a gagné
son bien.

Catelan respond, qu’il l’a gagné par
son trauail & ses veilles.

Zungododei luy dit, qu’il le tenoit
du Roy, & que pour ses parens ils
estoient fort obscurs.

Catelan se trouuant offensé, prend
vne assiette, & en donne à trauers la
teste de Zungododei, le coup porta au
dessous de l’œil gauche, & causa vne
contusion assez apparente.

Zungododei se trouue surpris, il
veut repartir, mais Bordeaux l’empescha,

-- 6 --

& le retint, Mazel se saisit de
Catelan, & dit qu’il a tort : Bordeaux
luy fait reproche d’auoir frappé Zungododei
en sa maison : Catelan gronde
entre ses dents, & dit souuent ruiner
Paris, & sort du logis repetant ses
mots.

 

Cependant la tumeur de Zungododei
augmente, & Bordeaux qui a
quelquefois passé par les mains du Chirurgien,
luy apliqua vn cataplasme d’Olicrate,
au moyen duquel l’enfleure ne
parut pas si grosse.

Peuples iugez de ce discours, Zungododei
est l’organe du Mazarin : Il en
veut à vne belle & grande Ville, & il
ne tiendra pas à luy qu’il n’allume la
colere du Roy contre tous ses Habitans.
Mais s’il est si hardy que d’y entrer
auec tous ses supposts ; Ie le recommande
à vos prieres & oraisons,
& aussi le venerable Zungododei, lequel

-- 7 --

ie vous prie de traiter selon ses merites.

 

Et en attendant, trouuez bon que ie
vous die, que Catelan merite remerciement.

Le Mazarin ayant apris ce demeslé,
dit ; Que l’authorité Royale estoit
blessée en la personne de son Secretaire,
& ne vous estonnez pas de ce discours,
il a tellement accoustumé de
mesler les interests du Roy auec les
siens ; Que l’autre iour le Broglio
ayant esté encloüé, c’est vn cheua qui
est dans son escurie, que Broglio luy a
donné, il dit que l’authorité Royale
estoit encloüée.

FIN.

-- 8 --

Section précédent(e)


Anonyme [1652], HISTOIRE VERITABLE D’vn accident tragyque arrivé à Pontoise, en la maison du sieur de Bordeaux Intendant des finances. , françaisRéférence RIM : M0_1651. Cote locale : B_15_23.