CHANSON NOVVELLE,
Sur la deliurance de Monsieur de
Brousel, Conseiller du Roy en sa
Cour de Parlement de Paris : Sur
le chant, Thoinon la belle Iardiniere,
&c.

 

NE faut point passer sous silence,
Les faits de Monsieur de Brousel,
Car par sa grande vigilence
Et par son soing continuel,
Rendra la France Florissante
Qui ne sera plus languissante.

 

 

François il nous faut crier viue,
Louys nostre Roy Tres-Chrestien,
Aussi que tout bon-heur arriue
A de Brousel homme de bien,
La France luy est redeuable
Par son conseil tres-admirable.

 

 

Heureux le iour de la Naissance
A de Broussel homme estimé,
Dans Paris & par tout la France,
Il est de tout chacun aymé,
A ce vertueux personnage,
Tout Paris à rendu hommage.

 

 

Cette belle langue faconde
Et son parler tout diuin,
N’auoit-il pas rauy le monde ?
Comme fit autre-fois Seruin,
De Broussel en a fait de mesme
Ce qui fait que tout chacun l’ayme.

 

 

Faut auoir dans nostre memoire
Desormais Monsieur de Brousel,
Car il nous ayme il le faut croire
D’vn amour qui est paternel,
Qui fait que par tout on l’admire,
Et que tout bien on luy desire.

 

 

Prions Dieu benir ses années,
Et qui les vueilles prolonger,
Et que la paix nous soit donnée
Affin de nos maux soulager,
Et nous oster de l’indigence
Et nous renuoyer l’abondance.

 

 

La France sera réjoüye,
Aussi ses pauures Habitans,
Qui pourront mieux gagner leur vie,
Et desormais viure contans,
Nous faut donc reprendre esperance
De bien-tost sortir de souffrance.

 

 

Mais quel bon-heur pour sa lignée
Que ses parens furent joyeux,
Quand liberté luy fut donnée
Et qui le reuirent auprés d’eux,
Grand ioye en eut la populace,
Qui à Dieu en a rendu grace.