LISTE GENERALE DE
tous les Mazarins, tant du
Parlement que de Messieurs de
la Ville, qui sont sortis de Paris
le huict & neufiesme de Iuillet.

Auec les Confessions des quatre Escheuins
faites dans l’Hostel de cette dite Ville
à plusieurs Curez & Vicaires de cette
Ville de Paris.

LORS que la France iouïssoit des conquestes
ordinaires qu’elle a accoustumé depuis sa
Monarchie, mais la continuation que le Cardinal
de Richelieu en auoit faite par les armes de
Louis treiziesme, sous la conduite de plusieurs braues
generaux, dont chacun a veu le fruict de toutes ces
victoires, & du depuis la mort dudit Roy dont est
yssu Louis quatorziesme, dont nous esperions vn repos
& vne tranquilité par toute l’Europe, voyant la
France florissante telle qu’elle estoit en ce temps-là ;

-- 4 --

mais ce braue Prince, & ce ieune Roy estant encore
dans l’innocence, ne pouuoit pas reconnoistre les
abus & maluersations qui ce commettoient par tout
son Royaume, par le mauuais conseil du Ministre
d’Estat qui estoit le Cardinal Mazarin, lequel est encore
à present : Nonobstant ce pernicieux conseil,
Monseigneur le Duc d’Orleans pour lors Chef du
Conseil, & Monseigneur le Prince ayant fait des choses
si merueilleuses pour le triomphe de la France,
tant en Flandre qu’en Allemagne & en plusieurs autres
endroits, dont ils ont fait florir les Lys, tel que
vous pourrez bien considerer iusques à la bataille de
Lance & Rocroy, Tionuille, Graueline, & plusieurs
lieux dans la Flandre.

 

Mesme en Allemagne Philisboug & toutes les autres
Villes qui sont demeurez à l’obeissance du Roy,
n’est ce pas de ce que nos Princes ont fait paroistre
par la valeur, & pour monstrer qu’ils tiennẽt encore
quelque branche que ces anciens Gaulois ont fait resentir
aux Romains : mais pour reuenir à nostre discours,
nous sçauons tres-bien que lors que le Conquerant
de cette fameusse bataille de Lens eut enuoyé
la nouuelle au Roy & à la Reine, il fut chanté vn
Te Deum, que nous appellerons le sujet dont il deuoit
estre desiné & tres-bon, mais la Commedie changea
bien tost ces actes en Tragedie : car lors que l’on faisoit
mine de rendre grace à Dieu pour cette fameuse
victoire, il fut ordonné que l’on arrresteroit ce bon
homme Monsieur de Bruxelle, que l’on peut appeller
miroir de bonne exemple enfin ce braue homme
fut emmené, il donna la terreur à tous les autres
Presidens Conseillers de toutes les Chambres & mesmes
à plusieurs autres de la ville qui depuis se sont

-- 5 --

tousiours porté contraire à tout ce que nos Princes
& quelque autres du Parlement iusques à present,
apres nous auoir fait tant de mal, tant de remise en
to te assemblée qu’a la fin ils ont ioué de leur stratageme,
l’ayant bien fait paroistre par leur sortie de la
Ville de Paris, & par la confession des Escheuins faits
en l’Hostel de Ville en presence de plusieurs Curez,
& Vicaires de la Ville de Paris mandez pour ce sujet.

 

Confession de Monsieur Denissot Escheuin, depuis
que ie suis entré en la charge d’Echeuinage, i’ay
tousiours fait ce que i’ay peu pour m’eschapper de
tous les embaras des affaires presentes : mais mon entrée
ayant esté portée au Cardinal Mazarin, & sera
iusques a tant que ie pourray, & s’y ie ne puis, ne dites
pas pour moy, ora pro nobis.

Confession de Monsieur Philippe, ayant esté esleué
en la loy Mazarine, il est impossible que ie me
puisse rendre Catholique Romain, si le feu qui me
gagne resiste iusqu’à mes os, ie seray contrainct de
dire ora pro eo.

Confession de Monsieur Guillois, si i’eusse creu
tous mes amis lors que ie fus esleu le Preuost des
Marchands n’eust pas eu mon support : mais l’inclination
qui a fait mon renom estendre en toute la
France pour mon obstination, sera cause que ie diray
que si ie me fasche, ie méloigneray pour le temps de
ma vie pour estre Solitaire.

Confession de Monsieur le Vieux, Hélas ! falloit-il
que pour vn temeraire, prendre tant d’interests, &
non pas pour moy-mesme, & qu’à present dans l’occasion
où ie suis, que ie sois dans les flammes, braues
Curez & Vicaires de la Ville qui estes instituez pour

-- 6 --

nous pardonner nos fautes, ie vous demande pardon
pour Monsieur de l’Hopital, & Monsieur le Preuost
des Marchands, & tous mes trois Conferes s’il vous
plaist de me pardonner, ie vous en auray obligation,
& lors que e seray sorty de la Maison de Ville, &
tous mes Confreres nous chanterons, Miserere.

 

Liste de la sortie des Mazarins.

Monsieur le President de Bailleur, à la grande
Chambre.

Monsieur le President Amelot, à la Cour des Aydes.

Monsieur le President Congneux, à la grande
Chambre.

Monsieur de Novion President au Mortier grande
Chambre.

Monsieur de Maisons President Mazarin de la grande
Chambre.

Monsieur le President de Nemond, à la grande
Chambre.

Monsieur le President de Bellieure à la grand
Chambre.

Monsieur le President de la Moignon Chambre.

Monsieur le Meusnier Deputé, nous l’attendons,
si il reuient, nous ne disont rien de luy n’y de ces
trois Confreres.

Monsieur Portail Conseiller à la Troisiesme Cham

Monsieur Pont Care Conseiller à la deuxiesme
Chambre.

Monsieur d’Aubray, Lieutenant Ciuil & Iuge de
Police.

-- 7 --

Monsieur le Mareschal de l’Hopital, cy-deuant
Gouuerneur de Paris.

Monsieur le Cardinal de Retz, Coadiuteur de
Paris.

Monsieur de Longueil, Chambre.

Voila la teneur de tout ce que l’on te puis apprendre
de la bonne issuë de tous les Mazarins, qui nous
font voir la verité de ce que tu dois esperer de leurs
entreprise par leurs fuitte General à tous.

-- 8 --