DV IEVDY NEVFIESME FEVRIER
mil six cens cinquante-vn, du matin.

CE jour la Cour, toutes les Chambres assemblées,
les Gens du Roy, Maistre Omer
Talon Aduocat dudit Seigneur portant la
parole, ont dit ; Que suiuant l’ordre qu’ils
receurent hyer de la Cour, ils prierent
Monsieur le Garde des Sceaux de leur faire
donner audiance de la Reyne, lequel leur ayant dit qu’ils se
trouuassent au Palais Royal à six heures du soir, ils furent introduits
dans le mesme Cabinet, dans lequel Messieurs les
Deputez eurent le iour precedent leur audiance, auquel Cabinet
le Roy & la Reyne estoient assis, & proche d’eux Monsieur
le Garde des Sceaux, Monsieur le Mareschal de Villeroy,
& les quatre Secretaires d’Estat ; Ils dirent au Roy
SIRE, les Deputez du Parlement, hyer au soir, supplierent
vostre Majesté de vouloir faire expedier les ordres necessaires
pour la liberté presente de Messieurs les Princes, & en suite
des Lettres de Declaration d’innocence : Outre plus, ils remercierent
Vostre Majesté de ce qu’il luy auoit plû faire retirer
M. le Cardinal Mazarin, & la supplierent de luy enjoindre
de sortir le Royaume, & donner au Parlement Lettres
de Declaration pour exclure des Conseils du Roy les
Estrangers, mesmes les naturalisez, & tous ceux qui auoient
serment à autre Prince qu’au Roy ; Ausquelles supplications
Vostre Majesté n’ayant pas fait de responce precise, & l’ayant
differée au premier iour, ils nous ont employé vers Vostre
Majesté, pour la supplier de leur faire l’honneur qu’ils puissent
sçauoir aujourd’huy sa volonté, pour en deliberer demain

-- 4 --

matin ; Et outre, qu’il plaise à Vostre Majesté, faire retirer
de Paris & du Royaume, les parens dudit sieur Cardinal & ses
domestiques, qui sont Estrangers. A quoy la Reyne a respondu,
tant par sa bouche, que par celle de M. le Garde
des Sceaux ; Que l’absence de Monsieur le Cardinal Mazarin
n’estoit pas vne chose feinte ny suposée susceptible de condition,
qu’il s’estoit retiré sans dessein ny pensée de retour,
qu’elle en auoit donné part à Monsieur le Duc d’Orleans, &
que sa parole ne manqueroit iamais, que nous pouuions en
asseurer la Compagnie ; Et pour le monstrer, que son Neveu
s’estoit retiré dés le matin, & que ses Niepces partiroient aujourd’huy
sans y manquer : Et pour ce qui regarde la liberté
de Messieurs lès Princes, la Reyne leur auoit dit qu’elle y trauailleroit
incessamment, comme elle l’a promis ; mais que cela
ne se pouuoit faire que de concert auec Monsieur le Duc
d’Orleans ; Elle eust esté bien aise de le resoudre auec ledit
Seigneur Duc seul à seul ; Que si il y apporte de la resistance,
qu’elle luy enuoyera Monsieur le Garde des Sceaux pour en
traitter auec son Altesse Royale, où bien qu’il plaise à Monsieur
le Duc d’Orleans, que les amis de Messieurs les Princes
en traittent auec luy ; Que la Reyne desirant, dans vne conference
qui se peut faire cette apresdînée, terminer vne affaire
de cette importance, & iustifier que ses desseins sont sinceres
sans reserue & sans cauillation. FAIT en Parlement l’an
& iour susdits.