SVR ce qui a esté representé à la Cour,
que le Sieur Duc d’Espernon, a baillé
diuer ses Ordonnances dans lesquelles
il qualifie Calomnieusement les Habitans
de Bordeaux, rebelles & factieux,
faict semer diuers faux bruits cõtre les Habitans, bien
que pour iustifier leurs bonnes intentions il ne soit
besoin de considerer que leur moderation & conduite
dans l’oppression qu’ils ont soufferte & souffrent
depuis huict mois, neantmoins cét mauuaises impressions
ont eu tel effect quelles on fait consentir & contrainct
les Habitans des Villes de Bergerac, Ste Foy,
Mont-flanquin, Mont-segure, Lareole, Marmande,
& autres du ressort de la Cour, de fournit des gens de
Guerre, pour cõcourir aux mauuais desseins dudit Duc
d’Espernon Mais d’autant que dans toutes les rencontres
les Habitans de cét Ville sont demeuré vnis à ceux
de Bordeaux, pour le Seruice du Roy, qu’õ peut dire à

present que c’est contre leur inclination qu’ils ont
fourny des Armes pour conbatre lesdits Habitans,
& que bien informés de leurs desseins ils reuoqueront
leurs Troupes, s’vniront auec eux & bailleront passage
à ceux qui veullent porter des viures & venir au
seruice de cette Ville dont la perte entraine auec elles
la leur ineuitable. Ouy sur ce, le Procureur General
du Roy La Cour, Les Chambres extraordinairement
assemblées, à Ordonné & ordonne que les Habitans
desdites Villes & autres du ressort de la Cour, seront
informé, des veritables oppressions qu’ont souffert les
Habitans de Bordeaux, depuis huict mois & souffrẽt
encore par l’ordre dudit Duc d’Espernon, & seront
exortés de rappeller les gẽs de Guerre fournis par elles
audit Duc d’Espernon, & bailler passage à ceux qui
accourent à la deffences de cette Ville, & porter des
viures cõme ils auoient accoustumé de faire moyennant
ce ladite Cour a mis & met les Habitans desdites
Villes soubs la protection du Roy & de la Cour, faict
inhibitiõs & deffences audit Duc d’Espernon & tous
autres de leur mesfaire en leurs personnes & biens &
en consequence leur a permis & permet de s’armer
de repousser ceux qui voudroient y porter de l’Empeschement,
ordonne que le present Arrest sera Imprimé
leu, publié par tout ou besoin sera. Donné en
Parlement le 24. Septembre, 1649.