Lettre enuoyée de S. Germain à l’Imprimeur.

MONSIEVR,

L’employ dont feu Monseigneur le Duc de Chastillon m’auoit
honoré pendant sa vie, m’ayant donné beaucoup d’accez aupres de
luy, & ayant reconnu dans toutes ses actions vne inclination tres-zelée
pour le public ; i’ay crû qu’il estoit de mon deuoir de faire
connoistre à tout le monde quels ont esté ses sentimens. I’espere que les
derniers paroles qu’il a tenu à Monsieur le Prince, suffiront pour
effacer les impressions que son malheur pourroit auoir donné à son
desauantage, apres les auoir recueillies auec soin, ie n’aurois pas differé
à vous en enuoyer le memoire, si i’eusse trouué plutost la commodité de
vous le faire tenir seurement. Ie vous prie de le mettre en lumiere auec
le plus de diligence que vous pourrez ; quoy que ie ne sois pas connu
de vous, ie ne doute point que vous ne m’accordiez cette faueur,
en consideration d’vn homme de qui la memoire doit estre par tout en
veneration.

De S. Germain en Laye ce Vendredy
12. Feurier 1649.

-- 3 --