Anonyme [1649], RELATION VERITABLE DE ce qui s’est fait & passé à la prise & reduction du Chasteau Trompette, auec les Articles qui ont esté accordez au sieur de Hautmont le 18. Octobre mil six cens quarente neuf. , françaisRéférence RIM : M0_3200. Cote locale : C_9_31.
SubSect précédent(e)

RELATION
VERITABLE DE CE QVI
s’est passé à la prise & reduction
du Chasteau-Trompette, auec
les Articles qui ont esté accordez,
au sieur de Hautmont le dixhuitiesme
Octobre 1649.

LE dix-septiesme à vnze heures du Matin
toute l’armée de la Bourgeoisie fut
commãdée de se mettre sous les armes pour
l’attaque du Chasteau qui se deuoit faire au
lendemain : ils y passerent la nuict en cet
estat, & le dix-huitiesme Iuin on cõmença a
disposer toute choses pour l’assaut, & d’aporter

-- 4 --

les eschelle au nombre de cent pour
monter apres que deux mines qui estoient
en estat auroient fait leur effet. Les assiegés se
voyant reduits à cette extremité pour n’attendre
pas le coup de leur perte, demanderent
à voir les mines, & qu’apres ils capituleroient,
ce qui leur ayant esté accordé
deux Officieres sortirent du Chasteau pour
les visiter & rentrerent apres pour en faire
leur raport au sieur du Hautmont Gouuerneur
qui demanda aussi tost à la capituler.
Ce qui fut executé sur les trois heures en
la maniere qui en suit.

 

Articles de la captiuation faite auec lesdits
sieur Filoise maior & le sieur Tillanges
Lieutenant, lesdits sieurs enuoyez par ledit
du Hautmont Gouuerneur du Chasteau-Trompette.

Premierement tant ledit sieur du Hautmont
que tous les autres qui sont dans le
Chasteau sortiront la vie sauue auec leurs
armes, tambour battant, mesche allumée
par les deux bouts, balle en bouche & bandoulieres
pleines.

-- 5 --

Pourront aussi tant ledit sieur du
Haumont que tous les autres qui sont
deuant ledit Chasteau emporter leur bagage,
qui consistera en leur habit & linge
ordinaire d’eux & de leurs femmes, lequel
bagage sera visité pour plus grande
assurance : ensemble emmeneront deux
cheuaux appartenans audit sieur du
Haumont.

A esté accordé que lesdit capitulans
sortiront dés auiourd’huy dudit Chasteau,
& le remettront entre les mains de
Monsieur le Marquis de Sauuebeuf, &
& pour sauf conduit, il sera fourny deux
batteaux suffisans pour leur conduite
iusque à Rions, escorte necessaire pour
leur seureté, en fournissant de part &
d’autre des ostages pour l’asseurance du
retour de batteaux, escorte & conduite.
Fait à Bordeaux au camp deuant le Chasteau-Trompette
le dix-huitiesme Octobre 1649.

Monsieur d’Espernon auec toute son

-- 6 --

armée n’ayant osé approcher de la ville
du costé de Graues, ny tenter le secours
dont il a si souuẽt menacé les Bourdelois
ny par eau ny par terre, s’est affin reduit
à releuer sa reputation, & estendre
ses faits d’armes par toute la violence,
rauage, pillage, violemens & desolatiõs
des maisõs d’ẽtre les deux mers, ayãt ruiné
tous les vignobles & vãdãges ouuertes,
& lasché toutes les cuues desia pleines,
ruiné & vuidé toutes les barriques
& vaisseaux viuans pour les mettre hors
de seruice, en fin fait exercé tout ce que
le plus grand ennemy du Roy & de l’Estat
pourroit faire en cét estat, & desolant
toute la campagne, il a passé depuis Cadillac
iusques à Lormont & Embarets,
sçachant bien que la riuiere qui le separoit
d’auec, ses ennemis le garentissoit de
leur visite. Il auoit deux pieces de campagne,
& faire courre le bruit qu’il venoit
camper au port de la Bastide, mais
sçachant que les Bordelois y auoient de

-- 7 --

la garde, & mesme au lieu de cenon, il
s’est bien empesché d’en approcher, ne
cherchant l’employ de ses armes que
contre de pauures paysans de villages abandonnez,
& ayant eu aduis par ses espions
que l’on alloit forcer le Chasteau,
il a leué le siege & s’est retié crainte des
mauuaises rencontres.

 

FIN.

-- 8 --

SubSect précédent(e)


Anonyme [1649], RELATION VERITABLE DE ce qui s’est fait & passé à la prise & reduction du Chasteau Trompette, auec les Articles qui ont esté accordez au sieur de Hautmont le 18. Octobre mil six cens quarente neuf. , françaisRéférence RIM : M0_3200. Cote locale : C_9_31.