DV CONNESTABLE.

LA dignité de Connestable est assez cogneuë en France, comme
estant le premier office de la Couronne, qui a le pouuoir
sur toute la milice, & qui est au dessus de tous ceux qui sont dans
les armées, excepté la personne du Roy ; c’est à luy d’ordonner
de toutes les batailles, cheuauchées & places de Gouuernement.
Il porte l’espée nuë du Roy, & luy en fait hommage à sa reception ;
il fait vn mesme corps auec les Mareschaux de France ses
collegues, & tous ensemble n’ont qu’vne mesme iustice au Palais,
en laquelle les Iugemens s’intitulent de son nom & desdits
Mareschaux, quoy que il n’y en ait de pourueu : l’ancien des Mareschaux
le representant, il est Duc & Pair pour raison de sa charge,
& receu au Parlement ; il n’a point esté nommé à icelle depuis
le deceds de Monsieur de Lesdiguieres.