LE GRAND CONSEIL.

LE Chancelier y est né President. Cette Compagnie est composée
de quatre Presidens, & 150. Conseillers qui seruent par
Semestre ; c’est à dire de six en six mois. Elle cognoît Souuerainement
des euocations & differends, qui procedent des contrarietez
d’Arrests, Indults des Cardinaux, Archeuesques, Euesques,
Abbez, Maladeries, Hospitaux, Prieurez, Electifs ou Conuents,
des autres Benefices, dont la nomination appartient au Pape, ou
autrement la totale prouision, collations, ou presentations au
Roy, qui à dans cette Cour son Aduocat & Procureur general : Les
Offices de President y valent 200000. liures, & des Conseillers
100000. liures : leur Iurisdiction a son Palais prez du Louure, &
les Aduocats qui sont receus en cette Compagnie, peuuent playder
par tous les Parlemens, Cours Souueraines & ressors du Royaume.