CHANCELIER DE FRANCE.

C’est Monsieur Seguier, cy-deuant President au Parlement de
Paris, dont l’authorité ne void rien au dessus de luy, qui est
comme seuere censeur des Ordonnances, Edicts, Volontez &
Commandemens du Roy, le Souuerain Magistrat de la Iustice.
C’est luy qui despesche les Graces, Dons, Offices & autres semblables
choses que les sujets requierent ordinairement, & toutes
Despesches qui sont sans Sceau sont de nulle valeur.

S’il arriue quelque mescontẽtement aux Roys contre le Chancelier,
à cause que le nom en est sainct & inuiolable, & le caractere
en quelque façon indelebile, on leur donne des Substitus, qui
portent le nom de Garde des Seaux, d’autant que la qualité de
Chancelier ne leur doit estre communiquée ; du viuant de celuy
qui a esté pourueu & honoré de cét Office : Et ainsi nous auons
veu Monsieur de Marillac & Monsieur de Chasteau neuf, tous
deux Garde des Seaux, pendant que Monsieur le Chancelier
d’Aligre a vescu. Depuis sa disgrace & apres sa mort, Messire
Pierre Seguier a pris le tiltre de Chancelier, qu’il exerce auiourd’huy
auec vne approbation generalle de tous les gens de
bien.

C’est luy qui a fait voir ce que peut l’authorité de certe charge,
ayant interdit le Parlement de Roüen, & seuerement puny toute
la Prouince de Normandie, pour auoir entrepris contre les loix
& volonté du Prince, ayant chasse les plus rebelles, & cassé les
Priuileges, dont les Villes jouyssoient auparauant leur desobeyssance.

-- 22 --

Vous remarquerez que iamais le Chancelier ne porte le dueil,
ny pour pere, ny pour femme, ny autres considerations particulieres,
ne deuant estre sensible à d’autres interests qu’à ceux du
Peuple. Il porte tousiours la robbe de velours noir, doublée de
panne cramoisie, & deuant luy marchent deux Huissiers auec de
grosses chaisnes d’or & d’autres auec des masses d’or sur l’espaule.