leur enuie ordinaire fait tousiours auorter les
desseins les mieux concertez ; Et toutes les precautions
du monde ne sçauroient iamais destourner vn
mal-heur, lors qu’ils se sont mis en estat de nous le
procurer pour faire triompher leur indépendance de
toute nostre conduite. S. A. R. s’estoit bien prudemment
emparée de tous les passages du Loire, dont il
falloit necessairement que le Mazarin en ouurir vn ; si
toutefois il vouloit pousser iusques à la Cour. Mais ce
Ministre qui est depuis long-temps en possession d’acheter
ses victoires, n’a pas manqué d’en forcer, le
plus auantageux, auec son or ; Et d’obliger les Messieurs
de Gien à fausser lâchement la foy qu’ils auoiẽt
engagée à S. A. R. auec serment qu’ils ne laisseroient
iamais le passage libre aux trouppes de ce Cardinal,
qu’apres qu’ils ne seroient plus en estat de leur pouuoir
contester par vne foible resistance.

Cette lascheté me confirma bien dans mon ancienne
croyance, & me fit encor resoudre à me defier
pour iamais de toutes les promesses des peuples,
qui ne sont pour l’ordinaire que des haines impuissances
& des animositez sans conduite ; puis que ceux
qui sembloient les plus interessez à repousser viuement
l’ennemy commun, furent les premiers à se
laisser corrompre par ses amorces, lors mesme qu’il
estoit de besoin de s’opposer à sa marche auec plus
de vigueur que iamais. Ainsi bastissant sur cette lascheté
les fondemens de mon iuste déplaisir, ie me
resolus deslors à n’attendre plus le Mazarin, que pour
luy témoigner par ma retraite que sa presence m’estoit
contagieuse ; & qu’à ses yeux mesmes ie voulois