LE MANIFESTE DE MONSEIGNEVR
le Duc d’Orleans : Auec les conspirations du Cardinal
Mazarin, découuertes par son Altesse Royale,
enuoyées aux bons François. Et la prise de quatre
cent Casaques.
LE bon-heur & la gloire de la France
estãt attachés aux interests du Roy,
& l’vn & l’autre ne pouuant subsister
que par la trãquilité du Royaume,
& celle-cy par l’vnion de la Maison
Royalle ; il est tres certain que
pour procurer le bien de l’Estat, il faut necessairement
se releuer de cette authorité, que la mauuaise
conduite d’vn Conseil peruers a beaucoup raualé,
& faire l’accord de sa Majesté & du Prince.
Or il est important de considerer que les interests
du Roy sont non seulement separés de ceux de
son Cõseil & détachés d’auec ceux de ses Ministres ;
Que mesme la mauuaise conduite des personnes qui
ont abusé de son authorité par leurs violences &
par leurs iniustices, les a rendu du tout differents
& mesme en quelque façon incompatibles.
Pour remedier à tant de desordres qui menaçent
la France d’vne extréme desolation, ie n’ay point
trouué de meilleur moyen que de faire valoir l’authorité
du Roy, laquelle se trouue engagée par
vne Declaration expresse donnée depuis sa Majorité
contre le Cardinal Mazarin, en faisant executer