volontez du Roy, puis qu’elles n’ont point
d’autres visées que le restablissement de la legitime
authorité Royale, contre laquelle il y
a tant eu d’atteintes : la paix & tranquilité de
l’Estat & le soulagement des peuples.

Nous pouuons dire sans vanité que toutes les
Regences des Reines en France qui ont precedé
celle ou nous fusmes appellée par le feu Roy
Louïs XIII. d’heureuse memoire, que Dieu absolue,
pour gouuerner l’Estat pendant la minorité
du Roy à present regnant, il n’y en a pas
vne qui ait porté les affaires de la Couronne
dans vn plus haut esclat de la gloire que la nostre,
les premieres années de nostre gouuernement,
ayans esté conduites auec tant de bonheur
& d’addresse, que les conquestes qui ont
esté faites pendant icelles, en tendent vn parfait
tesmoignage, lesquelles ont acquis plus de
reputation à l’Estat en ce peu de temps, que n’auoit
fait tous les efforts qui auoient esté faits
depuis la declaration de la guerre : Et certes
tous ces grands progrez ont plustost esté vne
marque de nostre bonne conduite, & du bon
conseil que nous auions choisi, que l’effect des
forces qui nous eussent esté laissees par le feu
Roy : estant certain que la dissipation & le desordre
des Finances (qui sont les nerfs de la
guerre) estoient lors de nostre entrée au gouuernement