Anonyme [1652], LE GRAND RESSORT DES Guerres ciuiles en France. Faisant voir dans les vies de tous les Ministres d’Estat qui se sont ingerez de nous gouuerner. I. Qu’ils ont tousiours esté la source de toutes les dissentions publiques; & le sujet qui a fait prendre les armes aux Grands du Royaume. II. Qu’ils ont eux mesmes fait naître & entretenu les Guerres ciuiles, comme vn des moyens propres pour les rendre necessaires aux Rois, & pour se maintenir dans le Ministere. III. Qu’ils ont tousiours employé tous leurs artifices à detourner la conoissance des affaires d’Estat aux Rois, & fait tous leurs efforts pour abatre les Princes, & tenir les Peuples dans l’oppression. Le remede necessaire & Politique à tous ces desordres. I. Est de donner vn Conseil de sages testes au Roy, qui l’instruise dans l’art de Regner par soy mesme. II. D’éloigner de luy cõme des pestes d’estat tous ceux qui voudront s’opposer à ce loüable établissement. III. D’établir de rigoureux supplices pour les Ministres qui passeront leur deuoir, qui est seulement de donner conseil à leur Souuerain, sans iamais rien entreprendre
de leur teste: De rendre le rang aux Princes du Sang qui leur est deu par leur naissance; & donner le repos aux Peuples. , françaisRéférence RIM : M0_1513. Cote locale : B_3_18.
-- 23 --
de la conclure, & peut estre eust elle acheué
heureusement cét ouurage du Ciel, si elle n’eust eu
l’ambition prodigieuse d’vn Ministre à esleuer, qui
ne se nourrit que de guerre, de fureurs & d’iniustice.
Il a fallu remplir cette ardante soif qu’il auoit
du sang des François, qui l’ont donné auec abondance.
Il ne luy reste plus presentement qu’à sortir
de mesme façon qu’elle y est entrée, elle en a encor
le pouuoir, elle peut donner la Paix Generale, vn
bon Conseil au Roy & à toute la France, & vne
tranquillité à ses Peuples, desirée depuis si long-temps,
deslors elle fera la plus glorieuse retraitte
qu’elle sçauroit souhaitter, passant le reste de ses
iours dans le calme qu’elle aura procuré, auec les
loüanges & les benedictions de tout le monde, qui
s’efforcera de contribuer à son tour, tout ce qui luy
sera possible pour sa prosperité.
|