Anonyme [1649], LE FOVDROYEMENT DES GEANS MAZARINISTES ABYSMEZ SOVS LES RVINES DV FAMEVX ET DESOLÉ BOVRG DE CHARENTON , françaisRéférence RIM : M0_1404. Cote locale : C_5_12.
page précédent(e)

page suivant(e)

-- 3 --

LE FOVDROYEMENT DES
Geans Mazarinistes, abysmez sous les
ruines du fameux, & desolé Bourg
de Charenton.

L’Expérience nous a tousiours appris que iamais
le Ciel ne manque de vengeance pour
punir tost ou tard les temeraires, & les presomptueux ;
car plus la fureur de ces audacieux
les excite à faire la guerre à ceux qu’il
protege d’autant plus aussi sa colere l’anime à trauailler pour
les destruire. Quelque tout bon & misericordieux que soit
Dieu, si ne voulut il iamais pardonner, ny faire grace, aux
plus beaux de tous les Anges, qui pour s’estre voulus égaler
à luy, les a rendus par leurs cheures les plus horribles & affreux
de tous les Demons. Les Geans qui eurent la presomption
de vouloir escheler le Ciel, ne furent-ils pas a l’instant
renuersez d’vn coup de foudre sur la terre. De tous les crimes
dont les mortels se puissent iamais soüiller il n’y en a
point de plus enormes, ny que la Iustice diuine chastie si seuerement
que l’orgueil & le desespoir. Ne peut on pas à
bon droict conuaincre de ces crimes, ces creatures, ces seconds
de Mazarin, ces boutefeux, ces rodomons, & ces arrogans,
qui pipez de l’esperance de participer aux quatre
millions d’or qu’a promis cet infame Estranger au Chef de
sa ligue, se sont si souuent vantez en faueur de ce Monstre
abominable de la nature, de consommer & reduire Paris en
feu & en flammes, de violer les filles en la presence de leurs
meres, de tuer les enfans à la veue de leurs peres, & en suite
acheuer ce ruinet la France, pour assouuir leur rage, & leur
tyrannie ? N’est-ce pas estre bien presomptueux, que de se



page précédent(e)

page suivant(e)