vouloient faire renaistre les mesmes troubles en vostre Estat,
arrestassent le cours de leurs mauuais desseins ; il n’y a point de malheur
pareil aux factions & guerres ciuiles : Factiones fuere eruntque magu
exitio pluribus populas quam bella externa quam fames morbiué. T. Liue.
Ce sont des deluges qui bouleuersent & noyent les plus puissans
Royaumes, & ils deuoient s’opposer puissamment à ce mal heur
pour en retenir la rapidité : Ils n’y ont pas manqué, SIRE ; il est vray
que ç’a esté ce semble auec plus de douceur & de bonté qu’ils ne deuoient,
mais la Iustice qui est tousiours assaisonnée de clemence ne
peut auoir plus de vitesse & de rigueur ; elle a vne espée, mais elle a
vne balance ; & cette balance, disent les Astrologues, est au Zodiaque,
entre le Signe de la Vierge, & celuy du Scorpion : Elle est seuere,
mais sa seuerité est douce, elle marche comme les Dieux
quand ils chastient :Dij pedes habent laneos. Elle va lentement ; c’est ce
que nous ont signifié les Anciens par vne riche peinture ; Ils peignoient
la Iustice sur vn chariot de triomphe qui n’estoit traisné ny
par des cheuaux, ny par des cerfs legers, mais par deux vieilles femmes
qui ne pouuoient presque se soustenir, l’vne portoit à la main
vn baston sur lequel elle s’appuyoit, & l’autre vne espée rompuë ; cela
veut dire, SIRE, que la Iustice doit estre lente à punir, & que si
elle a de la seuerité, cette seuerité doit estre douce ; les Iuges doiuent
vser de maturité en leurs iugemens, & ne se pas precipiter : Nostre
Dieu & le vostre, SIRE, nous en donne l’exemple, quoy qu’il soit
l’œil du monde ; que rien n’eschappe à sa connoissance ; qu’il voye
sans considerer ; qu’il n’ait pas besoin de temps pour s’instruire, &
que sans Arithmetique, sans regle, sans mesure & sans poids, il connoisse
le nombre, la dimension, la valeur & la grauité de chaque chose ;
neantmoins l’impieté & la voix des crimes des Sodomites ayant
monté iusques à son Throsne ; & l’ayant irrité, il en differe le chastiment,
& demande du temps pour s’en instruire ; Descendam & videbo.
Genes. 18. La clemence & la Iustice, SIRE, sont les deux principales
vertus des Roys, le Prince ne doit rien tant aymer que la clemence,
& n’auoir rien tant en horreur que la cruauté : c’est pour cette raison
que les Souuerains sont appellez Pasteurs des oüailles, les Peres
des peuples, & que les Romains appelloient leurs Empereurs & leurs
Roys du nom de Sauueurs, ainsi estoient nommez les Iuges d’Israël,
pour nous apprendre la necessité de la douceur & de la misericorde
en leurs personnes.

La Iustice & la misericorde, SIRE, sont les deux Poles des Monarchies,