>Aduis au Lecteur.
MESSIEVRS,
Puis que tout le monde se mesle de vous donner des nouuelles, i’ay
crû que vous ne trouueriez pas mauuais que ie vous fisse part de celles
que i’ay aprises depuis huict jours, si elles vous sont agreables ie tascheray
par la suite de celles qui viendront à ma connoissance, de
contenter vostre curiosité. Mais n’attendez de moy, ny de grandes
prefaces, ny des paroles estudiées, & moins encore des loüanges
ou des inuectiues affectées. Ie laisse ces petits soins à ceux qui
veulent remplir leurs feüilles à quelque prix que ce soit, ou qui
establissent leur gloire sur des papiers volans, & leur fortune sur
la faueur. Pour moy, comme mon mestier est de courir, ie ne sçaurois
m’attacher qu’aux choses necessaires, les digressions, qui sont
à peine suportables dans vn corps d’histoire, me semblent trop ennuyeuses
dans vn journal pour vous en presenter dans celuy-cy :
& la verité est assés belle pour n’auoir pas besoin d’ornement
estranger. Si vous trouuez que ie me sois trompé en quelque chose,
donnez moy moyen de me tromper moins à l’auenir. L’Imprimeur
receura vos auis quand il vous plaira de nous en faire part,
& le public vous en sera obligé auec moy.