il ne faut qu’interroger le peuple de Paris, qui
a cognoissance des propositions faites de puis quelques
iours à Monsieur le Duc d’Orleans sur le sujet
de son retour par Monsieur Turgot Conseiller d’Estat :
Il ne faut qu’interroger les plus notables des
trois Ordres, sur le credit qu’il conserue dans les Conseils
du Roy par leur moyen, & dans la distribution
des benefices & charges du Royaume. Enfin il ne
faut qu’interroger ceux qui reçoiuent des lettres &
aduis de Cologne, Rome, & Auignon, ils apprendront
qu’on parle dans ces lieux du retour du Cardinal
Mazarin comme d’vne chose conclue & arrestée :
& ses Emissaires dans Paris ont la hardiesse de dire,
qu’il faut qu’il reuienne : on doit esperer que le Ciel
confondra ses desseins, & que le Parlement cognoissant
la iustice de la demande de Monsieur le Prince,
laquelle respond aux vœux de tous les bons François,
ordonnant l’execution de ses Arrests, & punissant
ceux qui ont contreuenu aux defenses portées par
iceux, vsant de son authorité, il nous desliurera
du mal duquel nous sommes menacez, par les
moyens qu’il trouuera, par sa prudence ordinaire,
pour esloigner les trois creatures de ce Ministre, &
luy fermer à iamais les passages de son retour en France,
luy en faire perdre toutes les esperances, &
mesme luy en oster les pensées.

FIN.