Anonyme [1649], LE COMBAT ET LE CARTEL DE DEFFIT DE L’AMOVR A LA PAIX. EN DIALOGVE. , françaisRéférence RIM : M0_712. Cote locale : C_2_37.
L’Amour.
Ie ne sçay par qu’elles maximes, Tu me veux imposer des crimes, Et tu fuis tant mon entretien, Moy qui n’entreprends iamais rien, Qui fut contre la bien-seance.
La Paix.
Mais bien contre la sapience.
L’Amour.
Fais donc m’en sçauoir la raison ?
La Paix.
Ceux qui sont dedans ta prison, Et qui viuent sous ton empire, Tu les y faits mourir de rire, Et leur troubles tant le cerueau, Qu’ils n’ont pas plus d’esprit qu’vn veau.
L’Amour.
Sçachez que c’est tout le contraire, Mes courtisans sçauent l’affaire, Ie donne de cœur & d’esprit, I enseigne à mettre par escrit, Et par l’aspect de ma seule ombre, Ie rends ioyeuse vne humeur sombre.
La Paix.
Ie sçay que par tes rudes coups, Les plus sages sont les plus foulx, Les mieux disants n’osent rien dire, Car ils craignent tousiours du pire, Et par des contraires effets, Tu fais voir les plus imparfaits, Ioyeux, gaillards de bonne mine, Et pour la race feminine, Tu la rends sans comparaison, Plus folle que n’est vn oyson.
| |||||