Anonyme [1652], LE BREVIAIRE DES MINISTRES D’ESTAT, LEVR FAISANT CONNOISTRE les cas ausquels ils sont Inferieurs au Parlement de Paris. I. Pour faire voir comme quoy, le Conseil d’Estat n’a le pouuoir de receuoir le serment des Ducs & Pairs. II. Pour ne pouuoir faire le procés aux Princes du Sang. III. Pour ne pouuoir faire vallider les Edicts & Declarations du Roy. IV. Et pour ne pouuoir contraindre le Ressort du Parlement de Paris d’obeïr à ses Arrests. , françaisRéférence RIM : M0_607. Cote locale : B_19_52.
page précédent(e)

page suivant(e)

-- 6 --

des Ministres & du Conseil du Roy, ne
leur permet pas de regarder tous ses ordres auec
cét aueuglement d’obeïssance ; & comme ils sont
conuaincus par l’experience de tant d’attentats,
que toutes les intentions de ces Conseillers
Bastards, ne tendent qu’au bouleuersement
de cette Monarchie, ils se sont resolus d’ouurir
les yeux pour enuisager les ordres de leur Souuerain,
iusques à ce que ce ieune Monarque ne
se conduira plus que par les mouuemens reglez
de ses inclinations, & les oblige de reprendre
l’aueuglemẽt de leur premiere obeïssance, pour
receuoir ses ordres auec toute sorte de respect
& de soubmission.

 

Mais d’attendre cét aueuglement pendant
que tant d’éclairs & tant de tempestes, nous
feront ouurir les yeux pour en voir la cause d’esperer
que tout l’Estat ployera pour receuoir le
ioug d’vn Estranger, & enrichir vn Banqueroutier
Sicilien, de toutes les ruines de cét Estat.
C’est ce que le Conseil du Roy ne peut pretendre
qu’auec la mesme tyrannie, auec laquelle il
veut que nous adorions sa conduite, sous pretexte
qu’elle est appuyée de l’apparence de l’authorité
d’vn Souuerain.

D’auantage, les Ministres & le Conseil du
Roy pretendent estre au dessus de l’authorité
du premier parlement de France, & qu’ils ont



page précédent(e)

page suivant(e)