Anonyme [1652], LA VERITÉ, PARLANTE AVEC liberté, sur l’Estat present. I. Sur la corruption de tous les Ordres & Loix du Royaume, dans le Ministere du Cardinal Mazarin. II. Sur les mal-heurs que la France à soufferts par sa tyrannie. III. Sur les moyens de preuenir à l’aduenir le Gouuernement des Estrangers. IV. Et pour pourueoir à la Regence durant la Minorité & le bas-aage de nos Rois. , françaisRéférence RIM : M0_3997. Cote locale : B_17_27.
page précédent(e)

page suivant(e)

-- 6 --

entreprises temeraires : Ces trois Tableaux se
verront dans cette Verité parlante, qui est l’Histoire.

 

Le premier Tableau fait cognoistre l’importance
que les Oncles du Roy & les Princes de
son Sang ayent le Gouuernement de l’Estat,
tant en sa Minorité qu’apres sa Majorité iusques
à ce que l’aage luy permette de gouuerner
seul.

Ceux qui examinent les choses de prés, ont
de la peine à comprendre qu’on ait donné la
Regence à des femmes, qui sont ordinairement
Estrangeres, & qu’on ait refusé la succession legitime
à des filles, qui sont tousiours naturelles.
En effet cette Loy, que nous appellons Salique,
sans sçauoir pourquoy, & que nous deuons
d’autant plus reuerer que nous en ignorons
l’origine, iusques mesme à l’hetymologie
de son nom, n’a laissé la Couronne de France
qu’aux masles, & pour parler auec le peuple, n’a
voulu que le Royaume tombast en quenoüille,
si vne Loy que nous ne suiuons seulement à cause
de la vieillesse, qui est égale à celle de nostre
Monarchie ; mais à cause de l’vtilité qu’elle apporte
pour la conseruatiõ de la Couronne sur la
teste des Princes François : Elle est si excellente
que les autres Royaumes où les filles succedent,
ne laissent pas de l’imiter par toutes les precautions



page précédent(e)

page suivant(e)