qui conseilloient vne guerre iniuste & dommageable
au public, pour auoir librement donné
ses sentimens en des conseils tenus par aucuns
peu jaloux du repos de la patrie & fauteurs des
meschans, fut par leur poursuite violente banny
d’Athenes.

Themistocles vaillant Capitaine, ayant le
maniement des affaires de la Grece, fit voir plusieurs
faits heroїques de sa valleur. Il surmonta
les perses prés Sulamine : neantmoins les Atheniens,
sans considerer les grands seruices qu’il
leur auoit rendus, les voulant dissuader de faire
la guerre contre les Perses, pour le danger auquel
ils exposeroient la Grece, ils l’enuoyeront en
exil, & luy se joignant auec Xercés leur ennemy
capital, preuoyant la ruine prochaine de sa patrie,
& ne voulant soüiller la gloire de tant d’actions
heroїques & de si belles victoires qu’il
auoit gaignées, resolut de se faire mourir : en
sorte qu’apres auoir fait des sacrifices aux Dieux,
festiné ses amis & pris congé d’eux, il prit vn
breuuage du sang de Taureau, sorte de poison
qui fait mourir en vingt-quatre heures, & acheua
ainsi ses iours en la ville de Magnelio, aagé de
soixante-trois ans.

Ce sont les effets de l’enuie des meschans contre
les personnes de merite & vertueuses, qui
pour n’en courir le reproche de n’auoir bien seruy