la guerre de Prouence, & celle de Guyenne : & auec
tant d’empressemens & de soings, voyant que ces deux
Prouinces se perdoient absolument, que i’ay obtenu de la
Reyne contre les oppositions du Cardinal Mazarin, des
articles pour les vns & les autres. Ie mis la tranquillité
dans le Royaume, il ne s’y parloit plus de guerre, tout le
monde rendoit ses deuoirs au Roy auec la fidelité requise
& necessaire à de bons subiets. Ie demande à toute la France,
excepté au Cardinal Mazarin, qui ne veut que des desordres
pour se rendre necessaire ; si ce sont des crimes qui doiuent me
precipiter dans vne prison, la plus violente & la plus estroite
que iamais homme du monde le plus abominable ait
souffert pour la punition de ses forfaits.

Voyant le repos entierement establi par tout le Royaume,
i’ay sollicité la Reyne pour tascher d’obtenir de sa
bonté que l’on fist gouster vn peu de douceur à son peuple
apres tant d’amertume, en luy donnant la paix generale :
De sorte que i’en demande le pouuoir pour Monsieur le
Duc de Longueuille, le mesme qu’on luy auoit fait l’honneur
de luy donner autrefois, afin de l’aller conclure auec
les mesmes aduantages qu’il l’auoit faite dans ce temps là.
Mais comme le Cardinal Mazarin ne la trouuoit pas à propos,
parce que c’estoit pour le bien de l’Estat & pour le
soulagement du peuple, non pas pour son profit, il s’y opposa
auec les mesmes resistances que lors qu’il la rompit
apres que Monsieur le Duc de Longueuille l’eut concluë
à Ruel, & me dit hardiment qu’il n’en seroit rien fait,
voyant que c’estoit pour le bien de cette Monarchie : Et selon
les souhaits de tout le monde ie m’opiniastré tousiours
à la poursuite de cette pointe, & romps auec luy, cognoissant
qu’il vouloit consommer la France dans vne guerre
perpetuelle. En suite dequoy Monsieur le Duc d’Orleans
me commanda de la part de la Reyne d’oublier vn si iuste
ressentiment, & de me reünir à luy : Ie me soubmets aux
volontez de la Reyne, sous la parole que le Cardinal me
donna de trauailler à ladite paix.