mauuais preiugé de ce qu’il vaut ; puis que celuy qu’il
sert auec tant de deference pour ses ordres ne vaut
rien : On encherit bien encor par dessus : On dit que
Mazarin n’a suiuy que ses conseils les moins violents :
s’il eust tout suiuy, il eust tout perdu : On dit, qu’il fut
le premier autheur du siege de Paris, il est croyable
qu’vn homme qui a rompu la Paix, est bien capable
d’allumer, & de fomenter des dissentions.

Mais qu’elle est son ambition ? c’est celle de ceux
de son genie, & de son authorité : c’est de se pousser
au Ministere, ou plutost à la souueraineté par la confidence
d’vn ieune Maieur. Voila vn rang qui est bien
brigué : Si quelqu’vn sçait le naturel du Coadiuteur,
il n’ignore pas celuy du Comte de Seruient, parce que
le parallele en est parfait.

Le Comte de Seruient est hardy, si le Coadiuteur
ne l’est pas dauantage, il l’est du moins autant que luy :
Le Coadiuteur est seuere, c’est ce qui est de plus remarquable
dans le genie du Comte de Seruient : Ils
sont également capables & ambitieux : Pour la faueur,
le Comte de Seruient la possede plus sincerement que
luy, du costé de la Cour : Mais le Coadiuteur a cet aduantage
sur luy, qu’outre que le party de Messieurs
les Princes ne luy est pas tout a fait contraire, celuy de
la Cour luy est en quelque façon plus fauorable. Ainsi
le Comte de Seruient n’est pas si bien fondé que le Coadiuteur
dans les pretentions qu’il a pour le Ministere :
Parce que le Comte de Seruient ne peut subsister
que pendant que Mazarin subsistera : lors qu’il sera destruit,
le Coastiuteur ne laissera pas d’estre sur pied par
la faueur du Duc d’Orleans, l’vn & l’autre est choqué
par le plus puissant Protecteur, c’est à dire, par l’ennemy