mains : La politique en est bonne dans le dessein ; en
effet elle est vn peu trop complaisante pour vn homme
d’Estat : Passe neantmoins ; mais que fait il pour la faire
reüssir.

Il fait sortir le Roy de Paris, il luy conseille de poursuiure
le Prince : Comment s’accorde cecy ? Le Marquis
de Chasteau-neuf veut empescher le restablissement
du Mazarin, & cependant il contribuë à destruire
celuy qui seul peut l’empescher : Si le Roy n’eut point
poursuiuy le Prince, la peur de iustifier son armement
eut empesché la Reyne de r’appeler son Mazarin. Le
séjour du Roy dans Paris, & le restablissement du Mazarin
estoit impossibles en mesmes temps. Les violences
qu on faisoit au Prince ne tendoient qu’à l’obliger à vne
retraitte, pendant laquelle la Cour prendroit le pretexte
de le poursuiure, pour r’appeller en le poursuiuant, le
Mazarin : Le Marquis de Chasteau-neuf deuoit donc
voir qu’en donnant le Conseil de poursuiure le Prince,
il fauorisoit le retour du Mazarin. Cette Politique est
elle beaucoup esclairée ?

Ce n’est pas tout : Ou le dessein du Marquis de Chasteau-neuf
estoit de pousser promptement le Prince à
bout ; ou de le combatre par vne longue guerre : Ce second
seroit trop criminel pour vn homme que i’estime
encor homme de bien : Le premier est imprudent de
quelque biais qu’on le considere. Pousser le Prince à
bout, c’est oster toute sorte de crainte au Mazarin : c’est
faire tout ce qu’il faut pour son restablissement : Au reste
pour pousser le Prince à bout, il falloit le poursuiure
plutost ; parce qu’on luy ostoit le moyen d’armer pour
sa deffence : En le poursuiuant plus tard, on l’a mis en
estat de pouuoir resister & d’empescher par consequent
qu’on ne le poussat point à bout. Iugez de cette Politique.