pris plaisir qu’à nous voir à nostre aise, comme la
Reyne n’en aura iamais, que lors que nous n’en
aurons point.

Ou faudroit-il donc que Madmoiselle fut : dans le
Louure, & la Reyne à l’Escurial ou au Val-de-Grace :
Si la Vertu luy choisit la place qu’elle merite,
elle luy mettra la Couronne sur la teste, & la placera
sur le Trône des François. Nous ne serons heureux
que lors qu’elle nous gouuernera, & que la
Reyne quittera le Timon de l’Estat, pour le luy mettre
entre les mains.

Le premier President.

LE premier President a la mine d’vn bon Politique,
& la trongne d’vn homme d’Estat : Mais a
t’il autant de ieu que de mine ? N’a t’il pas plus, ou
moins de grimace, que de veritable seriosité ? C’est
ce qu’on conteste fort diuersement ; c’est ce que ie
m’en vay vuider definitiuement sans passion, mais auec
verité.

Faire le Politique, & estre Politique, sont deux choses
bien defferentes : Vn Acteur fera le personnage
d’vn Roy ; & ce ne sera cependant pas qu’vn païsan : l’efet
& l’apparence ne sont pas tousiours de compagnie :
fere le Politique, est auoir l’apparence de Politique :
estre Politique, c’est auoir l’effet.

Tout le monde confesse que le premier President
fait le Politique, & le grand homme d’Estat : Cela
veut dire, qu’il croit l’estre ; mais cela ne conuainc pas
qu’il le soit : Il est plus probable qu’il ne l’est pas,
pour cette seule raison qu’il le croit estre.

Les plus fins, sont ceux qui le paroissent estre le
moins, ceux qui en font profession, semblent aduertir
ceux qui traittent auec eux de se précautionner auec
plus de reflection. Il faut que le Politique soit fin : mais
il faut qu’il ne le paroisse pas par trop. Il se trahit luy-mesme,